- કંગના પહોંચી દિલ્હી, જે.પી નડ્ડા સાથે થઇ શકે મુલાકાત
- સુપ્રિયા શ્રીનેતને લઇને આપી પ્રતિક્રિયા
- કહ્યું, મંડીવાસીઓને દુઃખ થયું છે
બીજેપીએ હિમાચલ પ્રદેશની મંડી લોકસભા બેઠક પર કંગના રનૌતને ટિકિટ આપી છે. રાજકારણમાં એન્ટ્રી થતા જ કંગનાની ચર્ચાઓ વધી રહી છે. કોંગ્રેસ પ્રવક્તા સુપ્રિયા શ્રીનેતે સોશિયલ મીડિયા પર કંગનાને લઇને વિવાદિત પોસ્ટ કરી છે. જે વચ્ચે કંગના આજે દિલ્હી આવી છે. તે આજે બીજેપી અધ્યક્ષ જે.પી નડ્ડા સાથે મુલાકાત કરી શકે છે.
કંગના મળી શકે છે જે.પી નડ્ડાને
મહત્વનું છે કે જે.પી નડ્ડાને મળવા માટે કંગનાએ સમય માગ્યો છે. આજે રાતે 8.30 વાગે જે.પી નડ્ડા સાથે મુલાકાત થઇ શકે છે. દિલ્હી પહોંચવા પહેલા કંગનાએ સુપ્રિયા શ્રીનેતની વિવાદિત ટિપ્પણી પર કહ્યું કે મંડીને નાની કાશી કહેવાય છે. કોઇ પણ મહિલાને અપમાનિત કરવી યોગ્ય નથી. તમામ મંડીવાસીઓને દુઃખ થયુ છે.
શું કહ્યું મહિલા આયોગે ?
મહિલા આયોગે કહ્યું કે સોશિયલ મીડિયા પર કંગના રનૌત વિશે અભદ્ર અને અપમાનજનક ટિપ્પણીઓ કરવામાં આવી છે. ટ્વિટર પર એક પોસ્ટમાં, NCWએ કહ્યું કે કોંગ્રેસ નેતાની આવી કાર્યવાહી અસહ્ય અને મહિલાઓની ગરિમાની વિરુદ્ધ છે. ભારતના ચૂંટણી કમિશનરને એક પત્ર મોકલવામાં આવ્યો છે જેમાં તેની સામે તાત્કાલિક અને કડક કાર્યવાહીની માંગ કરવામાં આવી છે.
કંગનાએ શું પ્રતિક્રિયા આપી ?
કંગનાએ સુપ્રિયાનો સ્ક્રીનશોટ શેર કર્યો અને ઇન્સ્ટાગ્રામ પર લખ્યું, “પ્રિય સુપ્રિયા જી, એક અભિનેત્રી તરીકે, મેં મારી કારકિર્દીના છેલ્લા 20 વર્ષમાં તમામ પ્રકારની મહિલાઓની ભૂમિકા ભજવી છે. રાણીમાં નિર્દોષ છોકરીથી માંડીને ધાકડમાં ડિટેક્ટીવ સુધી, મણિકર્ણિકામાં દેવીથી લઈને ચંદ્રમુખીમાં રાક્ષસ સુધી. રજ્જોની વેશ્યાથી લઈને થલાઈવીમાં ક્રાંતિકારી નેતા સુધી. તેમજ સેક્સ વર્કરોના પડકારરૂપ જીવન અથવા સંજોગોનું વર્ણન કરવા માટે આવા અપશબ્દોનો ઉપયોગ કરવાનું ટાળવું જોઈએ. દરેક સ્ત્રી પોતાની ગરિમાને હકદાર છે. ”
સુપ્રિયા શ્રીનેતે સ્પષ્ટતા આપી હતી
સુપ્રિયા શ્રીનેતે હવે એક નિવેદનમાં દાવો કર્યો છે કે ઘણા લોકો તેમના સોશિયલ મીડિયા એકાઉન્ટની ઍક્સેસ ધરાવે છે. તેમણે કહ્યું કે, ઘણા લોકો મારા ફેસબુક અને ઇન્સ્ટા એકાઉન્ટની ઍક્સેસ ધરાવે છે. તેમાંથી એક વ્યક્તિએ ખૂબ જ અણગમતી અને વાંધાજનક પોસ્ટ કરી હતી. મને આ વાતની જાણ થતાં જ મેં તે પોસ્ટ હટાવી દીધી હતી. સુપ્રિયા શ્રીનેતે વધુમાં કહ્યું કે જે લોકો મને ઓળખે છે, તે લોકો સારી રીતે જાણે છે કે હું કોઈ મહિલા વિરુદ્ધ અંગત ટિપ્પણી કરતી નથી. મારી જાણકારીમાં એવું આવ્યું છે કે આ પોસ્ટ અગાઉ પેરોડી એકાઉન્ટ (@Supriyaparody) પર ચાલતી હતી. કોઈએ અહીંથી આ પોસ્ટ ઉપાડી અને મારા એકાઉન્ટ પર પોસ્ટ કરી. હું આ કૃત્ય કરનાર વ્યક્તિને ઓળખવાનો પ્રયાસ કરી રહ્યો છું. ઉલ્લેખનીય છે કે સુપ્રિયા શ્રીનેતે કંગનાને લઇને એક અભદ્ર ટિપ્પણી કરતી પોસ્ટ કરી હતી જેનો વિવાદ થતા અંતે પોસ્ટ ડિલીટ કરી હતી.
