Manipurમાં ભારેલા અગ્નિ જેવી સ્થિતિ, 3 મંત્રી, 6 ધારાસભ્યના ઘર પર હુમલો

મણિપુરમાં સ્થિતિ ફરી કાબૂ બહાર જવા લાગી છે. જીરીબામ જિલ્લામાં એક નદીમાંથી છ ગુમ થયેલા લોકોના મૃતદેહ મળ્યાના કલાકો બાદ રાજ્યમાં હિંસા ફાટી નીકળી હતી. પ્રદર્શનકારીઓએ શનિવારે ત્રણ મંત્રીઓ અને છ ધારાસભ્યોના ઘર પર હુમલો કર્યો હતો. જેના પગલે રાજ્ય સરકારે પાંચ જિલ્લામાં કર્ફ્યુ લાદી દીધો હતો અને કેટલાક ભાગોમાં ઇન્ટરનેટ સેવાઓ સ્થગિત કરી દીધી હતી. અધિકારીઓએ કહ્યું કે રાજ્યમાં સ્થિતિ વણસી રહી છે.

સીએમના જમાઈના ઘર પર પણ હુમલો કર્યો

પ્રદર્શનકર્તાઓએ મુખ્યમંત્રી એન બિરેન સિંહના જમાઈના ઘર સહિત ત્રણ ધારાસભ્યોના ઘરોમાં તોડફોડ કરી હતી. હિંસક ટોળાએ ધારાસભ્યોના ઘરોને આગ ચાંપી દીધી હતી. જવાબમાં સુરક્ષા દળોએ પ્રદર્શનકર્તાઓને વિખેરવા માટે ટીયર ગેસના શેલનો ઉપયોગ કર્યો હતો.

નદીમાંથી 6 મૃતદેહ મળી આવ્યા હતા...

સોમવારથી ગુમ થયેલી બે મહિલાઓ અને એક બાળકના મૃતદેહ શનિવારે જીરીબામની બરાક નદીમાંથી મળી આવ્યા હતા, જ્યારે શુક્રવારે રાત્રે એક મહિલા અને બે બાળકો સહિત અન્ય ત્રણ મૃતદેહો મળી આવ્યા હતા. આ મૃતદેહોને પોસ્ટમોર્ટમ માટે આસામની સિલચર મેડિકલ કોલેજ હોસ્પિટલમાં મોકલવામાં આવ્યા છે.

આ મંત્રીઓના ઘર પર હુમલો કરવામાં આવ્યો હતો

વિરોધીઓ દ્વારા જે મંત્રીઓના ઘરોને નિશાન બનાવવામાં આવ્યા હતા તેમાં આરોગ્ય અને પરિવાર કલ્યાણ મંત્રી સપમ રંજન, વપરાશ અને જાહેર વિતરણ મંત્રી એલ સુસિન્દ્રો સિંહ અને શહેરી વિકાસ મંત્રી વાય ખેમચંદના રહેઠાણોનો સમાવેશ થાય છે. વધતી હિંસાને ધ્યાનમાં રાખીને, રાજ્ય સરકારે ઇમ્ફાલ પૂર્વ અને પશ્ચિમ, બિષ્ણુપુર, થૌબલ અને કાચિંગ જિલ્લામાં કર્ફ્યુ લાદી દીધો છે.

મંત્રીએ રાજીનામું આપવાની વાત કરી

વિરોધીઓએ સ્વાસ્થ્ય મંત્રી સપમ રંજનના ઘર પર હુમલો કર્યો, જે ઇમ્ફાલ પશ્ચિમ જિલ્લાના લેમ્પેલ સાંકેઇથેલમાં સ્થિત છે. પોલીસે જણાવ્યું હતું કે સપમે વિરોધીઓને કહ્યું હતું કે તે કેબિનેટની બેઠકમાં છ હત્યાઓનો મુદ્દો ઉઠાવશે અને જો સરકાર જન ભાવનાઓને માન નહીં આપે તો તે રાજીનામું આપવા તૈયાર છે.