Uttar Pradesh: મિરઝાપુર ભયંકર અકસ્માત, સ્થળ પર 10 મજૂરોનાં કમકમાટી ભર્યા મોત

ઉત્તર પ્રદેશના મિરઝાપુર એક ભયાનક માર્ગ અકસ્માત સર્જાયો હતો. અહીં તેજ ગતિએ આવી રહેલા એક ટ્રકે મજૂરોથી ભરેલા ટ્રેક્ટર-ટ્રોલીને ટક્કર મારી હતી. આ અકસ્માતમાં 10 મજૂરોના મોત થયા હતા. જ્યારે ત્રણને ગંભીર ઇજા પહોંચી હતી. ઘાયલોને વારાણસીના ટ્રોમા સેન્ટરમાં દાખલ કરવામાં આવ્યા છે. આ અકસ્માત ભદોહીના મહારાજગંજ અને મિર્ઝાપુરની કટકા બોર્ડર પર થયો હતો.

ટ્રેક્ટરમાં કુલ 13 લોકો મુસાફરી કરી રહ્યા હતા

મળતી માહિતી મુજબ ટ્રેક્ટરમાં કુલ 13 લોકો મુસાફરી કરી રહ્યા હતા. તમામ મજૂરો ઔરાઈના તિવારી ગામમાંથી મકાન બાંધકામનું કામ કરીને વારાણસીમાં પોતાના ઘરે પરત ફરી રહ્યા હતા. અકસ્માત બાદ 10 મજૂરોના ઘટનાસ્થળે જ મોત થયા હતા. અકસ્માત બાદ ગ્રામજનોએ હાઈવે બ્લોક કરી દીધો હતો. આ પછી વહીવટીતંત્ર દ્વારા રોષે ભરાયેલા લોકોને શાંત પાડવામાં આવ્યા હતા અને મોડી રાત્રે હાઈવે પરનો વાહનવ્યવહાર સુચારૂ થઈ શક્યો હતો.

લોકોએ બચાવ કામગીરી શરૂ કરી દીધી હતી

પોલીસે જણાવ્યું કે ભદોહીથી બનારસ જઈ રહેલી ટ્રેક્ટર-ટ્રોલીને પાછળથી આવતી બસે ટક્કર મારી હતી. માહિતી બાદ પોલીસ ઘટના સ્થળે પહોંચી હતી. અગાઉ ગ્રામજનોએ બચાવ કામગીરી શરૂ કરી હતી. ઘાયલો અને મૃતકોને હોસ્પિટલમાં મોકલવામાં આવ્યા હતા. આ મામલે એફઆઈઆર નોંધીને કાયદેસરની કાર્યવાહી કરવામાં આવી રહી છે.

લોકો ટ્રોલીમાંથી ઉછળીને રોડ પર પડ્યા હતા

પ્રત્યક્ષદર્શીઓના જણાવ્યા અનુસાર ટ્રેક્ટર ચાલક કંઈ સમજે તે પહેલા જ અકસ્માત થયો હતો. ટક્કર એટલી જોરદાર હતી કે તેઓ ટ્રોલીમાંથી ઉછળીને રોડ પર પડ્યા હતા. તેમાંથી કેટલાક રસ્તા પાસેના ગટરમાં વહી ગયા હતા. રાહદારીઓની માહિતી બાદ પોલીસ ઘટનાસ્થળે પહોંચી હતી. આ પછી રાહત અને બચાવ કાર્ય શરૂ થયું.

તમામ મજૂરો વારાણસીના રહેવાસી

અકસ્માતમાં જીવ ગુમાવનારા તમામ મજૂરો વારાણસીના રહેવાસી છે. મૃતકોના નામમાં ભાનુ પ્રતાપ, વિકાસ કુમાર, અનિલ કુમાર, સૂરજ કુમાર, સનોહર, રાકેશ કુમાર, પ્રેમ કુમાર, રાહુલ કુમાર, નીતિન કુમાર અને રોશન કુમારનો સમાવેશ થાય છે. દરમિયાન ઘાયલોમાં આકાશ કુમાર, જામુની અને અજય સરોજનો સમાવેશ થાય છે. આ તમામ લોકો બિરબલપુર મિરઝામુરાદ અને રામસિંહપુર મિરઝામુદાર ગામના રહેવાસી હતા. આ અકસ્માત ગુરુવારે રાત્રે લગભગ 1 વાગ્યાની આસપાસ થયો હતો.