મુંબઈના પશ્ચિમી ઉપનગરોમાં છેલ્લા 10 થી 15 મિનિટથી ભારે કમોસમી વરસાદ શરૂ થયો છે. 13મેના રોજ સવારથી જ પશ્ચિમી ઉપનગરોમાં વાદળછાયું વાતાવરણ રહ્યું હતું. ત્યારબાદ સવારે 9 વાગ્યા પછી મુંબઈમાં ભારે વરસાદ શરૂ થઇ ગયો.
મુંબઇ પશ્ચિમમાં ધોધમાર વરસાદ
મુંબઇ શહેરમાં ધોધમાર વરસાદ વરસતા રોડ રસ્તા પાણી પાણી થયા છે. વરસાદના કારણે ભારે ટ્રાફિકજામના દ્રશ્યો પણ સર્જાયા છે. ટ્રાફિકજામથી લોકોને હાલાકી વેઠવાનો વારો આવ્યો છે.
હાલ ક્યાં વરસાદ ?
હાલમાં અંધેરી, જોગેશ્વરી, ગોરેગાંવ મલાડ, કાંદિવલી, વિલે પાર્લે અને સાંતાક્રુઝના પશ્ચિમી ઉપનગરોમાં ભારે કમોસમી વરસાદ પડી રહ્યો છે. સતત ભારે વરસાદને કારણે ગરમીથી ત્રસ્ત મુંબઈકરોને મોટી રાહત મળી છે. હવામાન વિભાગ દ્વારા આજે (મંગળવાર) અને કાલે (બુધવાર) મુંબઈ માટે 'યલો એલર્ટ' આપવામાં આવ્યું છે. થાણે અને મુંબઈમાં વાવાઝોડા અને વરસાદની આગાહી છે, અને દક્ષિણ કોંકણમાં પણ 'યલો એલર્ટ' આપવામાં આવ્યું છે. આ ઉપરાંત અહિલ્યાનગર, પુણે, કોલ્હાપુર, સતારા, સાંગલી અને સોલાપુર જિલ્લાના ઘાટ વિસ્તારોમાં વરસાદની ચેતવણી આપવામાં આવી છે.
કોંકણના સાવંતવાડી તાલુકામાં કમોસમી વરસાદ
સિંધુદુર્ગ જિલ્લાના સાવંતવાડી તાલુકાના બાંદા, ઈન્સુલી અને અકેરી વિસ્તારોમાં ગઈ કાલે ભારે કમોસમી વરસાદ થયો હતો. કમોસમી વરસાદને કારણે વાતાવરણ ઠંડુ થતાં ગરમીથી પરેશાન નાગરિકોને રાહત મળી. સિંધુદુર્ગમાં કેટલીક જગ્યાએ વાદળછાયું અને કેટલીક જગ્યાએ ગરમી છે.
ગઇકાલે નાસિકમાં વરસ્યો ધોધમાર
નાસિકના રહેવાસીઓને સતત પાંચમા દિવસે કમોસમી વરસાદનો સામનો કરવો પડ્યો. ગઈકાલે બપોરે નાસિક શહેરમાં ભારે વરસાદ વરસ્યો હતો. આ વરસાદને કારણે નાસિક શહેરના મધ્ય ભાગના રસ્તાઓ શાબ્દિક રીતે નદીઓ અને નાળાઓમાં ફેરવાઈ ગયા. અચાનક પડેલા વરસાદથી સામાન્ય જનજીવન અસ્તવ્યસ્ત થઈ ગયું હતું.
