- મુંબઇમાં ભારે વરસાદથી જનજીવન અસ્તવ્યસ્ત
- અનેક જગ્યાઓ પર ભરાયા પાણી
- લોકલ ટ્રેન સેવાઓ થઇ રહી છે પ્રભાવિત
મુંબઇમાં વરસાદી માહોલ જોવા મળી રહ્યો છે. મહારાષ્ટ્રના વિવિધ જિલ્લાઓમાં વરસાદને લઇને ઠેર ઠેર પાણી ભરાયા છે. ત્યારે વાત કરીએ મુંબઇની તો, મુંબઇમાં અનેક જગ્યાએ પાણી ભરાવાને કારણે ટ્રાફિક જામ અને લોકલ ટ્રેનની મુસાફરીને પણ અસર થઈ છે. દરેક પ્રકારના જોખમને ટાળવા માટે સમગ્ર શહેરમાં NDRFની ટીમો તૈનાત કરવામાં આવી છે.
લોકલ ટ્રેન સેવા થઇ પ્રભાવિત
ઉલ્લેખનીય છે કે મુંબઈમાં છેલ્લા 12 કલાકથી ભારે વરસાદ પડી રહ્યો છે. વરસાદના કારણે જાહેર અને ખાનગી વાહન વ્યવહારને અસર થઈ છે. શહેરના મુલુંડ અને મલબાર હિલ્સમાં સવારે માત્ર એક કલાકમાં 34 મીમી વરસાદ નોંધાયો હતો. મુંબઈમાં છેલ્લા 24 કલાકમાં 135 મીમી વરસાદ નોંધાયો છે. પરિણામે માનખુર્દ, પનવેલ અને કુર્લા સ્ટેશન પાસે રેલવે ટ્રેક પર પાણી ભરાતા હાર્બર લાઇન પર ટ્રેનો 15 થી 20 મિનિટ સુધી મોડી ચાલી રહી છે. તો બીજી તરફ મહાનગરમાં રસ્તા પર પાણી ભરાવાને કારણે બસ સેવા પ્રભાવિત થઇ છે.
આ રાજ્યોમાં એલર્ટ
ભારે વરસાદની સતત આગાહીને કારણે NDRFની ત્રણ ટીમો મુંબઈમાં તૈનાત છે. ભારતીય હવામાન વિભાગ (IMD) એ શહેર માટે યલો એલર્ટ જાહેર કર્યું છે. IMDએ શહેર અને ઉપનગરોમાં ભારે વરસાદની આગાહી કરી છે. ભારતીય હવામાન વિભાગ (IMD)એ 22 જુલાઈએ ઉત્તરાખંડમાં ભારે વરસાદ માટે રેડ એલર્ટ અને 23-25 જુલાઈ માટે ઓરેન્જ એલર્ટ જાહેર કર્યું છે.
પશ્ચિમ મધ્યપ્રદેશ અને ગુજરાત પ્રદેશમાં 22-23 જુલાઈ સુધી રેડ એલર્ટ જાહેર કરવામાં આવ્યું છે. જ્યારે છત્તીસગઢ, મધ્ય મહારાષ્ટ્ર અને પશ્ચિમ મધ્ય પ્રદેશમાં 22 જુલાઈએ ભારે વરસાદનું ઓરેન્જ એલર્ટ જાહેર કરવામાં આવ્યું છે. કોંકણ, ગોવા અને મધ્ય મહારાષ્ટ્રમાં 24 જુલાઈ સુધી, પૂર્વ અને પશ્ચિમ મધ્ય પ્રદેશમાં 23-24 જુલાઈ, ગુજરાત રાજ્યમાં 24-25 જુલાઈ, પૂર્વ રાજસ્થાન અને હિમાચલ પ્રદેશમાં 22-23 જુલાઈ સુધી ભારે વરસાદ માટે ઓરેન્જ એલર્ટ જારી કરવામાં આવ્યું છે.
