ગઈકાલે રાત્રે દિલ્હી-એનસીઆર સહિત નજીકના ઘણા શહેરોમાં ભારે વરસાદ પડ્યો હતો. એક તરફ ભારે વરસાદને કારણે લોકોને ભેજવાળી ગરમીથી રાહત મળી, તો બીજી તરફ, વૃક્ષો પડવાથી પાણી ભરાઈ જવા અને ટ્રાફિક જામના કારણે લોકોને ઘણી સમસ્યાઓનો સામનો કરવો પડ્યો.
હિમાચલ પ્રદેશના કુલ્લુ જિલ્લામાં શનિવારે ભારે વરસાદને કારણે અચાનક આવેલા પૂરમાં લગભગ 20 થી 25 વાહનોને નુકસાન થયું હોવાની અધિકારીઓએ પુષ્ટિ આપી છે. નિર્મંદના એસડીએમ મનમોહન સિંહે જણાવ્યું હતું કે ભારે વરસાદને કારણે સામાન્ય રીતે સૂકા રહેતો શાર્ષયા નાળો છલકાઈ ગયો હતો, પરંતુ કોઈ જાનહાનિ થઈ નથી.
દરમિયાન, એક અલગ ઘટનામાં, રામપુર અને કિન્નૌર વચ્ચે ઝાકરી ખાતે નજીકની ટેકરીઓમાંથી કાટમાળ પડતાં હિન્દુસ્તાન-તિબેટ રોડ (રાષ્ટ્રીય ધોરીમાર્ગ-5)નો મોટો ભાગ બંધ થઈ ગયો હતો. સોશિયલ મીડિયા પર શેર કરાયેલા વીડિયોમાં પૂરના પાણી અને કાટમાળમાં વાહનો વહી જતા જોવા મળ્યા હતા.જ્યારે સતલજ નદીમાં પણ પાણીનું સ્તર વધતું જોવા મળી રહ્યું છે. કેટલાક સ્થાનિક લોકોએ વાદળ ફાટવાની શંકા વ્યક્ત કરી હતી, પરંતુ અધિકારીઓએ સતત ભારે વરસાદને કારણે પૂર આવ્યું હોવાનું જણાવ્યું હતું.
સ્થાનિક હવામાન વિભાગે 27 અને 28 મેના રોજ તમામ 12 જિલ્લાઓમાં વાવાઝોડા અને 40-50 કિમી પ્રતિ કલાકની ઝડપે પવન ફૂંકાશે તેવુ યલો એલર્ટ જાહેર કરાયું છે. 25 અને 26 મેના રોજ સિરમૌર, સોલન, શિમલા, મંડી, કુલ્લુ, કાંગડા અને ચંબા માટે ખાસ ચેતવણી જાહેર કરવામાં આવી છે.
