બિહારની રાજધાની પટનામાં રવિવારે જનતા દળ યુનાઈટેડ (JDU)ની રાષ્ટ્રીય પરિષદની મહત્વપૂર્ણ બેઠક યોજાઈ. પાર્ટીના રાજ્ય મુખ્યાલય સ્થિત કર્પૂરી હોલમાં યોજાયેલી આ બેઠકમાં નીતિશ કુમારને ચોથી વખત સર્વસંમતિથી પાર્ટીના રાષ્ટ્રીય અધ્યક્ષ તરીકે પસંદ કરવામાં આવ્યા હતા. સાથે જ તેમને પાર્ટીના બંધારણમાં જરૂરી ફેરફાર સહિતના મહત્વપૂર્ણ સંગઠનાત્મક અધિકારો પણ સોંપવામાં આવ્યા હતા.
પાર્ટી કાર્યકર્તાઓએ ઉષ્માભર્યું સ્વાગત કર્યું
બેઠક દરમિયાન પોતાના સંબોધનમાં નીતિશ કુમારે સમ્રાટ ચૌધરીના નેતૃત્વ હેઠળ કાર્યરત NDA સરકારના કામકાજની પ્રશંસા કરી. બેઠક સ્થળે પહોંચતા જ પાર્ટી કાર્યકર્તાઓએ તેમનું ઉષ્માભર્યું સ્વાગત કર્યું. પાર્ટીના નેતાઓએ તેમને ફરી રાષ્ટ્રીય અધ્યક્ષ બનવા બદલ અભિનંદન પાઠવ્યા હતા. આ પ્રસંગે તેમના પુત્ર નિશાંત કુમારે પણ તેમના આશીર્વાદ લીધા હતા.
બેઠક બાદ પાર્ટીના રાષ્ટ્રીય પ્રવક્તા રાજીવ રંજન સિંહે જણાવ્યું કે નીતિશ કુમાર દ્વારા શરૂ કરાયેલી 'સાત નિશ્ચય પાર્ટ-3' યોજનાઓને રાજ્ય સરકાર અસરકારક રીતે અમલમાં મૂકી રહી છે. તેમણે કહ્યું કે બિહારમાં વિકાસકાર્યો માટે કેન્દ્ર સરકાર તરફથી પણ પૂરતું સહયોગ મળી રહ્યો છે. રાષ્ટ્રીય પરિષદની બેઠકમાં ચાર મહત્વપૂર્ણ ઠરાવો પર ચર્ચા કરીને મંજૂરી આપવામાં આવી હતી.
2016થી રાષ્ટ્રીય અધ્યક્ષ પદ પર છે નીતિશ કુમાર
પાર્ટીના નેતાઓએ JDUના સભ્યોની સંખ્યા એક કરોડથી વધુ થવા બદલ ખુશી વ્યક્ત કરી હતી. સાથે જ ઉમેશ કુશવાહા બિહાર JDUના પ્રદેશ અધ્યક્ષ તરીકે યથાવત રહેશે તેવી પણ જાહેરાત કરવામાં આવી હતી. ઉલ્લેખનીય છે કે નીતિશ કુમારને પ્રથમ વખત 2016માં રાષ્ટ્રીય અધ્યક્ષ બનાવવામાં આવ્યા હતા. ત્યારબાદ 2019, 2023 અને હવે 2026માં તેઓ ચોથી વખત આ પદે ચૂંટાયા છે, જે JDUમાં તેમના મજબૂત નેતૃત્વને દર્શાવે છે.
આ પણ વાંચો : Tamil Naduના તિરૂવલ્લુરમાં સી-ફૂડ ફેક્ટરીમાં ગેસ ગળતર, 7 મહિલાઓનાં મોત
