ભાજપના સાંસદ અનુરાગ ઠાકુરે પેપર લીક મામલે વિપક્ષ પર આકરા પ્રહાર કર્યા છે. સંસદમાં ચર્ચા દરમિયાન તેમણે કહ્યું કે પેપર લીકની સમસ્યા આતંકવાદથી ઓછી ખતરનાક નથી, કારણ કે તેનો સીધો ભોગ દેશના યુવાનો બને છે. તેમણે કહ્યું કે કેન્દ્ર સરકાર આ સમસ્યાનો સંપૂર્ણ ઉકેલ લાવવા માટે કડક કાયદો અને મજબૂત વ્યવસ્થા તૈયાર કરી રહી છે.
મોદી સરકાર યુવાનોના હિતમાં કામ કરી રહી છે
અનુરાગ ઠાકુરે જણાવ્યું કે મોદી સરકાર યુવાનોના હિતમાં કામ કરી રહી છે અને પેપર લીક રોકવા માટે કાયદામાં સુધારા લાવવામાં આવી રહ્યા છે. તેમણે કહ્યું કે સરકાર પરીક્ષા વ્યવસ્થાને વધુ સુરક્ષિત અને પારદર્શક બનાવવા માંગે છે, જેથી લાંબી કાનૂની પ્રક્રિયાના કારણે વિલંબ ન થાય. NEET પેપર લીક મુદ્દે તેમણે કહ્યું કે જેવી જ ગેરરીતિની માહિતી મળી, સરકારે તાત્કાલિક પગલાં લીધા હતા. તેમણે દાવો કર્યો કે ફરીથી પરીક્ષા યોજવાનો નિર્ણય લેવામાં આવ્યો અને સમગ્ર પ્રક્રિયા ઝડપથી પૂર્ણ કરવામાં આવી હતી.
અનુરાગ ઠાકુરે ઉત્તર પ્રદેશને 'પેપર લીક પ્રદેશ' બનાવવાનો આરોપ લગાવ્યો
અનુરાગ ઠાકુરે કોંગ્રેસ નેતા રાહુલ ગાંધી અને સમાજવાદી પાર્ટીના નેતા અખિલેશ યાદવ પર પણ નિશાન સાધ્યું. તેમણે આરોપ લગાવ્યો કે અગાઉની સરકારોના સમયમાં પણ અનેક પેપર લીકની ઘટનાઓ બની હતી. તેમણે સમાજવાદી પાર્ટીની સરકાર પર ઉત્તર પ્રદેશને 'પેપર લીક પ્રદેશ' બનાવવાનો આરોપ લગાવ્યો અને કહ્યું કે યુવાનોના હકો સાથે અન્યાય થયો હતો. તેમણે કહ્યું કે કેન્દ્ર સરકારે દેશમાં પ્રથમ એન્ટી-ચીટિંગ કાયદો લાવ્યો છે અને હવે તેમાં વધુ સુધારા કરવામાં આવી રહ્યા છે. સાથે જ નંદન નીલેકણીની અધ્યક્ષતામાં ટાસ્ક ફોર્સ બનાવવામાં આવી હોવાનું પણ તેમણે જણાવ્યું.
અનુરાગ ઠાકુરના નિવેદન બાદ સંસદમાં સમાજવાદી પાર્ટીના સાંસદોએ વિરોધ નોંધાવ્યો હતો અને હોબાળો કર્યો હતો. કેટલાક સાંસદો વેલમાં આવી ગયા હતા. અધ્યક્ષ તરફથી તેમને પોતાની બેઠકો પર પરત જવાની અપીલ કરવામાં આવી હતી. પેપર લીક મુદ્દે સરકાર અને વિપક્ષ વચ્ચે રાજકીય ટકરાવ વધુ તેજ બન્યો છે.
આ પણ વાંચો : MEA on PoJK Election: વિદેશ મંત્રાલયે પાકિસ્તાન કબજા હેઠળના કાશ્મીરમાં હિંસા અંગે શાહબાઝ સરકાર પર કર્યા પ્રહાર
