પાઇલટ ગ્રુપ ALPA ઇન્ડિયાએ શુક્રવારે જણાવ્યું હતું કે એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) એ સરકારી ધારાધોરણોનો ઉલ્લેખ કરીને એર ઇન્ડિયા વિમાન દુર્ઘટનાની તપાસ કરી રહેલી ટીમમાં તેના પ્રતિનિધિનો સમાવેશ કરવાની વિનંતીને નકારી કાઢી છે.
ALPA ઇન્ડિયા અને AAIB વચ્ચે બેઠક
એરલાઇન પાઇલટ્સ એસોસિએશન (ALPA) ઇન્ડિયાના પ્રતિનિધિઓએ શુક્રવારે રાષ્ટ્રીય રાજધાનીમાં AAIBના ડિરેક્ટર જનરલ GVG યુગંધર સાથે મુલાકાત કરી હતી. ચર્ચા મુખ્યત્વે વિમાન દુર્ઘટનાની તપાસમાં વિષય નિષ્ણાતોની નિમણૂક પર કેન્દ્રિત હતી. બેઠક પછી, ALPA ઇન્ડિયાના પ્રમુખ સેમ થોમસે જણાવ્યું હતું કે ચાલુ તપાસને કારણે એર ઇન્ડિયા વિમાન દુર્ઘટના પર વધુ ચર્ચા થઈ નથી.
પાઇલટ ગ્રુપના પ્રતિનિધિને શા માટે સામેલ કરવામાં આવ્યો ન હતો?
"AAIB એ સરકારી ધોરણોનો ઉલ્લેખ કરીને એર ઇન્ડિયા વિમાન દુર્ઘટનાની તપાસ કરી રહેલી ટીમમાં વિષય નિષ્ણાત તરીકે ALPA પાઇલટનો સમાવેશ કરવામાં અસમર્થતા વ્યક્ત કરી હતી," તેમ તેમણે કહ્યું હતું
એર ઇન્ડિયાની ફ્લાઇટ AI 171 ક્રેશ થઈ ગઈ હતી
ઉલ્લેખનિય છે કે 12 જૂને અમદાવાદથી ટેકઓફ થયા પછી તરત જ એર ઇન્ડિયાની ફ્લાઇટ AI 171 ક્રેશ થઈ ગઈ હતી. આ અકસ્માતમાં 241 મુસાફરો સહિત કુલ 260 લોકોએ જીવ ગુમાવ્યા હતા.
બેઠકમાં આમંત્રણ આપવામાં આવશે
સેમ થોમસે જણાવ્યું હતું કે AAIB એ ALPA ઇન્ડિયાને ખાતરી આપી છે કે ભવિષ્યમાં તેને ત્રિમાસિક બેઠકોમાં આમંત્રણ આપવામાં આવશે. ALPA ઇન્ડિયાએ ગુરુવારે (2 ઓક્ટોબર, 2025) જણાવ્યું હતું કે AAIB સાથેની બેઠક અકસ્માત તપાસમાં વિષય નિષ્ણાત તરીકેની તેની ભૂમિકા અંગે ચર્ચા કરવા માટે હતી.
બળતણ પુરવઠો એક સેકન્ડના અંતરાલમાં બંધ કરી દેવામાં આવ્યો
12 જુલાઈના રોજ પ્રકાશિત થયેલા તેના પ્રારંભિક અહેવાલમાં, AAIB એ જણાવ્યું હતું કે વિમાનના બંને એન્જિનને બળતણ પુરવઠો એક સેકન્ડના અંતરાલમાં બંધ કરી દેવામાં આવ્યો હતો, જેના કારણે ટેકઓફ પછી તરત જ કોકપીટમાં મૂંઝવણ ઊભી થઈ હતી.
પ્રતિનિધિને સામેલ કરવાની સતત માંગ
વૈશ્વિક પાઇલટ સંગઠન IFALPA ના સહયોગી સભ્ય ALPA ઇન્ડિયા, અમદાવાદ વિમાન દુર્ઘટનાની તપાસમાં તેના પ્રતિનિધિને સામેલ કરવાની સતત માંગ કરી રહ્યું છે. ALPA ઇન્ડિયા અનુસાર, આ તપાસ પ્રક્રિયાને મજબૂત બનાવશે.
