હવામાનમાં ફરી એકવાર પલટો આવ્યો છે, જેનું કારણ 'ચક્રવાત અકવાન' (Cyclone Akwan) છે. હવામાન વિભાગના જણાવ્યા અનુસાર, શુક્રવારે આંધ્રપ્રદેશ અને દક્ષિણ ઓડિશાની સરહદ નજીક ગોપાલપુર પાસે 'અકવાન' ચક્રવાતી તોફાન તટ પરથી પસાર થયું હતું. જમીન સાથે અથડાતા પહેલા આ ભીષણ તોફાન નબળું પડીને સામાન્ય ચક્રવાતી તોફાનમાં ફેરવાઈ ગયું હતું.


હવામાન વિભાગે એક નિવેદનમાં જણાવ્યું છે કે, ચક્રવાત અકવાન સવારે 7:30 થી 8:30 વાગ્યાની વચ્ચે ગોપાલપુર નજીક તટ પરથી પસાર થયું હતું, તે સમયે પવનની ગતિ 70 થી 80 કિમી પ્રતિ કલાક હતી. આ ચક્રવાતી તોફાને હવામાનની સ્થિતિમાં ફરી ફેરફાર કર્યો છે, જેના કારણે દેશના વિવિધ ભાગોમાં વરસાદ પડી રહ્યો છે. હવામાન વિભાગે સંકેત આપ્યો છે કે આગામી દિવસોમાં ઘણા રાજ્યોમાં વરસાદ થવાની શક્યતા છે.


શનિવારે હવામાન કેવું રહેશે?

હવામાન વિભાગના જણાવ્યા અનુસાર, 20 થી 23 નવેમ્બર અને ૨૬ નવેમ્બર દરમિયાન તમિલનાડુ, પુડુચેરી, કરાઈકલ, દરિયાકાંઠાના આંધ્રપ્રદેશ, યાનમ, કેરળ, માહે અને રાયલસીમાના છૂટાછવાયા વિસ્તારોમાં વરસાદની શક્યતા છે. કર્ણાટકમાં ૨૩ થી ૨૬ નવેમ્બર દરમિયાન અને તેલંગાણામાં 20 નવેમ્બરના રોજ આવી જ સ્થિતિ રહેવાની ધારણા છે.


પૂર્વ મધ્યપ્રદેશમાં પણ ૨૨ નવેમ્બર સુધી વરસાદ થવાની શક્યતા છે. 21 તારીખે છત્તીસગઢના કેટલાક વિસ્તારોમાં ગાજવીજ, વીજળીના કડાકા અને તેજ પવન સાથે વરસાદ પડી શકે છે. બંગાળ, ઝારખંડ, ઓડિશા અને સિક્કિમના ઘણા ભાગોમાં ભારે વરસાદની આગાહી કરવામાં આવી છે. આ ઉપરાંત, 24 નવેમ્બર સુધી અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં છૂટોછવાયો વરસાદ થઈ શકે છે.


ઉત્તર ભારતમાં ઠંડી વધશે; ધુમ્મસ અંગે ચેતવણી જારી

તાપમાનમાં વધુ ઘટાડો થવાની શક્યતા છે. હવામાન વિભાગે જણાવ્યું છે કે 21 તારીખે આકાશ આંશિક વાદળછાયું રહેશે અને સવારના સમયે મોટાભાગના વિસ્તારોમાં ધુમ્મસ અથવા ઝાકળ જોવા મળી શકે છે. દિલ્હીમાં પણ તાપમાન ઘટશે. શનિવારે દિલ્હીમાં મહત્તમ તાપમાન 25 થી 27 ડિગ્રી સેલ્સિયસ અને લઘુત્તમ તાપમાન 13 થી 15 ડિગ્રી સેલ્સિયસની વચ્ચે રહેવાની શક્યતા છે. દિલ્હીના મોટાભાગના વિસ્તારોમાં મહત્તમ તાપમાન સામાન્ય કરતાં 3 ડિગ્રી સેલ્સિયસ જેટલું નીચું રહી શકે છે.


આ ઉપરાંત, હવામાન વિભાગે સંકેત આપ્યો છે કે 22 થી 23 નવેમ્બર દરમિયાન ઉત્તર પ્રદેશમાં ગાઢ ધુમ્મસ છવાયેલું રહી શકે છે. 20 થી 22 નવેમ્બર દરમિયાન હરિયાણા, ચંદીગઢ, દિલ્હી અને પંજાબમાં પણ ગાઢ ધુમ્મસ જોવા મળી શકે છે.

આ પણ વાંચો: US મોકલવામાં આવતી હતી નશીલી દવાઓના સિન્ડિકેટનો પર્દાફાશ, 6 આરોપીઓની કરી ધરપકડ