ભોપાલથી દિલ્હી જઈ રહેલી એર ઈન્ડિયાની ફ્લાઈટ AI-1886નું જયપુર એરપોર્ટ પર ઈમરજન્સી લેન્ડિંગ કરવામાં આવ્યું હતું. જયપુર તરફ વાળવામાં આવ્યા બાદ વિમાન સુરક્ષિત રીતે ઉતર્યું હતું. તમામ મુસાફરો અને ક્રૂ સભ્યો સંપૂર્ણપણે સુરક્ષિત છે. આ ફ્લાઈટ સવારે 8:25 વાગ્યે ભોપાલથી રવાના થવાની હતી પરંતુ સવારે 8:47 વાગ્યે ઉડાન ભરી હતી. તે સવારે 9:55 વાગ્યે દિલ્હી પહોંચવાની ધારણા હતી. જોકે, રસ્તામાં ફ્લાઈટનો માર્ગ દિલ્હીથી બદલીને જયપુર તરફ વાળવામાં આવ્યો હતો.
વિમાન સવારે લગભગ 8:36 વાગ્યે જયપુર તરફ આગળ વધી રહ્યું હતું અને સવારે લગભગ 9:40 વાગ્યે જયપુર એરપોર્ટ પર પહોંચ્યું હતું. વિમાનમાં સવાર તમામ મુસાફરો અને ક્રૂ સભ્યો સુરક્ષિત હોવાનું જણાવાયું છે. જોકે, ટેકનિકલ ખામીના પ્રકાર અથવા જયપુર તરફ માર્ગ બદલવાની જરૂરિયાત અંગેનું સત્તાવાર કારણ હજુ સુધી જાહેર કરવામાં આવ્યું નથી. ઈમરજન્સી લેન્ડિંગને કારણે મોટી દુર્ઘટના ટળી હતી.
એરલાઈનની ટેકનિકલ ટીમ દ્વારા તપાસ શરૂ
ગ્રાઉન્ડ સ્ટાફ અને એરલાઈનની ટેકનિકલ ટીમ હાલમાં વિમાનની તપાસ કરી રહી છે. એન્જિનમાં ખામી જણાતા પાયલોટે એર ટ્રાફિક કંટ્રોલનો સંપર્ક કર્યો હતો, જેના પગલે ફ્લાઈટનો માર્ગ જયપુર તરફ વાળવામાં આવ્યો હતો.
થોડા દિવસો પહેલા અમદાવાદમાં ઈમરજન્સી લેન્ડિંગ
આ પહેલા, ગુરુવારે સાંજે લખનૌથી દમ્મામ (સાઉદી અરેબિયા) જઈ રહેલી ઈન્ડિગોની ફ્લાઈટ 6E97નું બોમ્બની ધમકી મળ્યા બાદ અમદાવાદ એરપોર્ટ પર ઈમરજન્સી લેન્ડિંગ કરવું પડ્યું હતું. વિમાનમાં કોઈ શંકાસ્પદ વસ્તુ મળી આવી ન હતી. વિમાન સાંજે લગભગ 5:45 વાગ્યે અમદાવાદના સરદાર વલ્લભભાઈ પટેલ એરપોર્ટ પર ઉતર્યું હતું. તેમાં 107થી વધુ મુસાફરો સવાર હતા અને તેઓ તમામ, છ ક્રૂ સભ્યો સાથે, સુરક્ષિત રીતે નીચે ઉતર્યા હતા.
આ પણ વાંચો: Indonesia: જાવા સાગરમાં ગુમ થયેલા 102 મુસાફરોનો બચાવ, એકનું મોત
