આગામી 20 જુલાઈથી શરૂ થનારા સંસદના ચોમાસુ સત્રના સુચારૂ સંચાલન અને ગરિમા જાળવી રાખવા માટે રવિવારે દિલ્હીમાં એક મહત્વપૂર્ણ સર્વપક્ષીય બેઠક યોજાઈ હતી. સંસદ ભવનના એનેક્સી ખાતે આયોજિત આ બેઠકમાં સત્તાધારી પક્ષ અને વિરોધ પક્ષના વરિષ્ઠ નેતાઓ ઉપસ્થિત રહ્યા હતા. બેઠક દરમિયાન સંસદીય બાબતોના મંત્રી કિરેન રિજિજુએ તમામ પક્ષોને સત્ર દરમિયાન સકારાત્મક ચર્ચા કરવા અને સંસદમાં હંગામો ન મચાવવાની સલાહ આપી હતી.
NCPI ની અલગ બેઠક વ્યવસ્થા
આ સર્વપક્ષીય બેઠકનું એક મુખ્ય આકર્ષણ તૃણમૂલ કોંગ્રેસ (TMC) માંથી અલગ થયેલા 20 બળવાખોર સાંસદોની નવી પાર્ટી 'NCPI' ને અપાયેલું આમંત્રણ હતું. જોકે, લોકસભા સ્પીકર ઓમ બિરલાએ હજુ સુધી આ નવા પક્ષને સત્તાવાર માન્યતા આપી નથી, છતાં સાંસદોની સુરક્ષા અને વિવાદ ટાળવા માટે તેમની બેઠક વ્યવસ્થા અલગ કરવામાં આવી છે. બળવાખોર સાંસદોની મુખ્ય ટીએમસી સાંસદો સાથે ન બેસવાની માગણીને સ્વીકારીને તેમને અલગ બેન્ચ ફાળવવામાં આવી છે. આ નિર્ણય સંસદમાં સંભવિત જૂથબંધી અને ઘર્ષણને રોકવાના પ્રયાસ તરીકે જોવામાં આવી રહ્યો છે.