આયુષ્માન ભારત યોજના અંગે મોટા સમાચાર સામે આવી રહ્યા છે. આ યોજના હેઠળ હવે 112 બીમારીઓની સારવાર ખાનગી હોસ્પિટલોમાં નહીં મળી શકે. આ બીમારીઓની સારવાર માટેના પેકેજ માત્ર સરકારી હોસ્પિટલો સુધી મર્યાદિત કરવાની તૈયારી ચાલી રહી છે.
આ નિર્ણયથી એવા દર્દીઓને મુશ્કેલી પડી શકે છે, જેઓ આયુષ્માન ભારત યોજના હેઠળ આ બીમારીઓની સારવાર ખાનગી હોસ્પિટલોમાં કરાવવા ઇચ્છે છે.
મળતી માહિતી મુજબ, આ યોજના હેઠળ 23 બીમારીઓના સારવાર પેકેજ અગાઉથી જ સરકારી હોસ્પિટલો માટે અનામત રાખવામાં આવ્યા છે. આ બીમારીઓની સારવાર ખાનગી હોસ્પિટલોમાં આયુષ્માન યોજના હેઠળ કરાવી શકાતી નથી. હવે આ યાદીમાં વધુ વધારો કરવામાં આવી રહ્યો છે અને તેમાં વધારાના 89 સારવાર પેકેજ અનામત રાખવાનો પ્રસ્તાવ મૂકવામાં આવ્યો છે.
કેન્દ્ર સરકાર દ્વારા આ અંગેની નવી યાદી 1 ડિસેમ્બર 2026થી TMSમાં લાગુ કરવાની વાત કરવામાં આવી છે. જોકે, રાજ્ય સરકારોને પોતાના રાજ્યમાં આ નિયમ લાગુ કરવો કે નહીં તેનો નિર્ણય લેવાનો અધિકાર રહેશે.
મળતી માહિતી મુજબ, આ 112 સારવાર પેકેજમાં ડે-કેરથી લઈને લાંબી સારવાર અને સર્જરી સુધીની સુવિધાઓનો સમાવેશ થશે. તેમાં સ્ત્રીરોગ અને પ્રસૂતિ સંબંધિત સારવાર, નાનાં-મોટાં ઓપરેશન, ENT અને આંખના રોગો સંબંધિત સારવાર, માનસિક આરોગ્ય સેવાઓ, જનરલ મેડિસિન અને હાડકાં સંબંધિત બીમારીઓની સારવાર હવે માત્ર સરકારી હોસ્પિટલોમાં જ મળી શકશે.
અત્યાર સુધી અનેક બીમારીઓની સારવાર દર્દીઓ આયુષ્માન કાર્ડનો ઉપયોગ કરીને ખાનગી હોસ્પિટલોમાં કરાવી શકતા હતા. તેમાં હાઈ રિસ્ક ડિલિવરી, બાયોપ્સી, ગર્ભાશયનું ઓપરેશન, આલ્કોહોલિક લિવર ડિસીઝ, ચિકનગુનિયા, ઝાડા, એક્યુટ બ્રોન્કાઇટિસ, હેપેટાઇટિસ, મૂડ ડિસઓર્ડર, સ્ટ્રેસ મેનેજમેન્ટ, મેલેરિયા, સિસ્ટ, ફિસ્ટુલા, MTP, ગંભીર એનિમિયા, પેનક્રિયાટાઇટિસ, હિસ્ટરેક્ટોમી, મોતિયો, માનસિક અને વર્તણૂક સંબંધિત સમસ્યાઓ, એન્ઝાયટી, ADHD, ગ્લુકોમા સ્ક્રીનિંગ અને ફ્રેક્ચર સહિતની સારવારનો સમાવેશ થતો હતો.
પરંતુ આ ફેરફાર બાદ હવે આ બીમારીઓની સારવાર માત્ર સરકારી હોસ્પિટલોમાં જ મળી શકશે.
જોકે, આ યોજના હેઠળ કરવામાં આવનારા ફેરફાર સામે એક મોટો પડકાર સરકારી હોસ્પિટલોમાં માળખાકીય સુવિધાઓનો અભાવ અને દર્દીઓની ભારે ભીડ પણ છે. મોટાભાગની સરકારી હોસ્પિટલોમાં અદ્યતન સારવારની સુવિધાઓ, મશીનો, નિષ્ણાત તબીબો અને પૂરતું ઇન્ફ્રાસ્ટ્રક્ચર ઉપલબ્ધ નથી.
આવી સ્થિતિમાં સવાલ ઊભો થઈ રહ્યો છે કે આયુષ્માન યોજનામાં આ ફેરફાર થયા બાદ લોકોને સમયસર સારવારની સુવિધા કેવી રીતે મળી શકશે?
વધુ સમાચાર વાંચવા ડાઉનલોડ કરો સંદેશ ન્યૂઝ એપ : https://sandesh.com/d