જૂન મહિનો પૂર્ણતાના આરે છે અને જુલાઈ મહિનાની શરૂઆત થવા જઈ રહી છે. જો તમારે આવતા મહિને બેંક સાથે જોડાયેલા કોઈ મહત્વપૂર્ણ કામ કરવાના હોય, જેમ કે ચેક ક્લિયરન્સ, લોન પ્રોસેસિંગ અથવા ડ્રાફ્ટ બનાવવાનું કામ, તો આ સમાચાર તમારા માટે ખૂબ જ મહત્વના છે. રિઝર્વ બેંક ઓફ ઈન્ડિયા (RBI) ના સત્તાવાર કેલેન્ડર મુજબ, જુલાઈ ૨૦૨૬માં દેશભરની બેંકો વિવિધ કારણોસર કુલ 12 દિવસ બંધ રહેશે.
રજાઓનું વિભાજન
આ 12 દિવસની રજાઓમાં ચાર રવિવાર, બે શનિવાર (બીજો અને ચોથો શનિવાર) અને છ પ્રાદેશિક તહેવારોનો સમાવેશ થાય છે. ઉલ્લેખનીય છે કે, બીજા અને ચોથા શનિવાર તથા રવિવારની રજાઓ સમગ્ર દેશની તમામ ખાનગી અને સરકારી બેંકોમાં એકસરખી રીતે લાગુ પડે છે, જ્યારે તહેવારો પર આધારિત રજાઓ તે ચોક્કસ રાજ્ય કે શહેર પૂરતી મર્યાદિત હોય છે.
પ્રાદેશિક અને તહેવાર આધારિત રજાઓ:
6 જુલાઈ (સોમવાર): ઐઝોલ (મિઝોરમ) માં MHIP દિવસ.
9 જુલાઈ (ગુરુવાર): શિલોંગ (મેઘાલય) માં બેહ દેનખલામ.
16 જુલાઈ (ગુરુવાર): ભુવનેશ્વર (ઓડિશા) માં રથયાત્રા.
17 જુલાઈ (શુક્રવાર): ઇમ્ફાલ (મણિપુર) માં યુ તિરોટ સિંહની પુણ્યતિથિ.
18 જુલાઈ (શનિવાર): ગંગટોક (સિક્કિમ) માં દ્રુક્પા ત્શે-ઝી.
22 જુલાઈ (બુધવાર): અગરતલા (ત્રિપુરા) અને શિલોંગ (મેઘાલય) માં ખારચી પૂજા.
અન્ય રજાઓ:
5, 12, 19, અને 26 જુલાઈ: રવિવાર.
11 જુલાઈ: બીજો શનિવાર.
25 જુલાઈ: ચોથો શનિવાર.
ડિજિટલ બેંકિંગ ચાલુ રહેશે
બેંક શાખાઓ ભૌતિક રીતે બંધ હોવા છતાં, ગ્રાહકોએ નાણાકીય કાર્યો માટે ચિંતા કરવાની જરૂર નથી. ઇન્ટરનેટ બેંકિંગ, મોબાઇલ બેંકિંગ અને UPI જેવી ડિજિટલ સેવાઓ ૨૪/૭ કાર્યરત રહેશે. આ ઉપરાંત, કેશ ઉપાડવા માટે ATM સેવાઓ પણ રાબેતા મુજબ ચાલુ રહેશે. જોકે, સ્થાનિક સ્તરે કોઈ ચોક્કસ ફેરફાર હોય તો મૂંઝવણ ટાળવા માટે તમારી નજીકની શાખા કે બેંકની વેબસાઈટ પર એકવાર અવશ્ય તપાસ કરી લેવી હિતાવહ છે. અગાઉથી આયોજન કરવાથી તમે તમારા નાણાકીય કામોને કોઈપણ વિક્ષેપ વગર પૂર્ણ કરી શકશો.
આ પણ વાંચોઃ First Book: વિશ્વનુ પહેલું પુસ્તક કોણે અને ક્યારે છાપ્યુ હતુ? જાણો ઇતિહાસ
