બિહાર વિધાનસભા ચૂંટણીના બીજા અને અંતિમ તબક્કા માટેનો પ્રચાર પડઘમ રવિવારે સાંજે શાંત થયો છે. હવે, કોઈપણ રાજકીય પક્ષ રાજ્યમાં રેલીઓ કે સભાઓ કરી શકશે નહીં. બીજા તબક્કા માટે મતદાન 11 નવેમ્બર, મંગળવારના રોજ થશે, જેમાં કુલ 122 વિધાનસભા બેઠકોનો સમાવેશ થશે.
છેલ્લા દિવસે જોરદાર રેલીઓ અને જાહેર સભાઓ યોજી
મતદાનનો પ્રથમ તબક્કો 6 નવેમ્બરના રોજ પૂર્ણ થયો છે. ત્યારે આજે પ્રચારના અંતિમ દિવસે, ભાજપ અને કોંગ્રેસ સહિત તમામ મુખ્ય પક્ષોએ મતદારોને આકર્ષવા માટે જોરદાર રેલીઓ અને જાહેર સભાઓ યોજી હતી. નેતાઓએ પોતપોતાના ઉમેદવારોના સમર્થનમાં મતોની અપીલ કરી હતી. રવિવાર, બિહાર ચૂંટણી પ્રચારનો અંતિમ દિવસ, રેલીઓથી ભરેલો હતો. તમામ પક્ષોના મુખ્ય નેતાઓએ જોરશોરથી પ્રચાર કર્યો. કેન્દ્રીય ગૃહમંત્રી અમિત શાહે સાસારામના ફઝલગંજ સ્ટેડિયમ અને અરવલના મધુશર્મા મેળા મેદાનમાં જાહેર સભાઓ યોજી હતી.
કોંગ્રેસના નેતા રાહુલ ગાંધીએ કિશનગંજ અને પૂર્ણિયામાં રેલીઓ દ્વારા મતદારોનો ટેકો માગ્યો હતો. આ દરમિયાન ઉત્તર પ્રદેશના મુખ્યમંત્રી યોગી આદિત્યનાથે છતપુર અને નરપતગંજમાં ચૂંટણી રેલીઓ યોજી હતી, જેમાં NDA ઉમેદવારો માટે અનુકૂળ વાતાવરણ બનાવવાનો પ્રયાસ કરવામાં આવ્યો હતો. અંતિમ દિવસે, નેતાઓએ મતદારોને આકર્ષવા માટે તેમની સંપૂર્ણ તાકાત લગાવી હતી.
કેટલી બેઠકો પર થશે મતદાન?
બિહાર વિધાનસભા ચૂંટણીના બીજા તબક્કા માટેનો પ્રચાર રવિવારે શાંત થયો છે. હવે 11 નવેમ્બર, મંગળવારના રોજ 20 જિલ્લાઓની 122 વિધાનસભા બેઠકો માટે મતદાન થશે. અગાઉ, 6 નવેમ્બરના રોજ પ્રથમ તબક્કામાં 18 જિલ્લાઓની 121 બેઠકો માટે મતદાન થયું હતું. બીજા તબક્કામાં જે જિલ્લાઓમાં મતદાન થશે તેમાં ગયા, કૈમૂર, રોહતાસ, ઔરંગાબાદ, અરવલ, જહાનાબાદ, નવાદા, ભાગલપુર, બાંકા, જમુઈ, સીતામઢી, શિવહર, મધુબની, સુપૌલ, પૂર્ણિયા, અરરિયા, કટિહાર, કિશનગંજ, પૂર્વ અને પશ્ચિમ ચંપારણનો સમાવેશ થાય છે. ચૂંટણી પંચની તૈયારીઓ વચ્ચે બધાની નજર હવે મતદારોના નિર્ણય પર છે. ચૂંટણી પંચના ડેટા અનુસાર બિહાર વિધાનસભા ચૂંટણીના બીજા તબક્કામાં કુલ 1,302 ઉમેદવારો ચૂંટણી લડી રહ્યા છે, જેમાં 1,165 પુરુષો, 136 મહિલાઓ અને એક ટ્રાન્સજેન્ડર ઉમેદવારનો સમાવેશ થાય છે. આ તબક્કામાં 37 મિલિયનથી વધુ મતદારો મતદાન કરશે.
