બ્રાઝિલના સાઓ પાઉલોમાં એક હૃદયદ્રાવક ઘટના સામે આવી છે, જ્યાં સાહસ પ્રત્યેના પ્રેમે એક ૨૪ વર્ષીય યુવતીનો જીવ લીધો છે. મારિયા એડ્યુઆર્ડા રોડ્રિગ્સ ડી ફ્રીટાસ નામની યુવતીએ બંજી જમ્પિંગના આનંદ માટે "એન્ટ્રે કોર્ડાસ" નામની ખાનગી કંપનીને અંદાજે $290 (રૂ. ૨૪,૫૦૦) ચૂકવ્યા હતા. જોકે, આ સાહસિક પ્રવૃત્તિ તેના માટે જીવનનો છેલ્લો નિર્ણય સાબિત થઈ.
પુલ 30 વર્ષથી હતો બંધ
આ અકસ્માત લિમેરા અને કોર્ડેઇરોપોલિસ શહેરો વચ્ચે આવેલા "પોન્ટેઓ દો એસ્કેલેટો" પુલ પર થયો. આ પુલ છેલ્લા ૩૦ વર્ષથી બંધ હતો, પરંતુ સાહસના શોખીનો માટે તે લોકપ્રિય સ્થળ બની ગયું હતું. આ વિસ્તારમાં કોઈ સત્તાવાર સરકારી દેખરેખ કે સુરક્ષાના નિયમો ન હોવાથી આવી ખાનગી કંપનીઓ બેરોકટોક જીવલેણ પ્રવૃત્તિઓ ચલાવી રહી હતી.
સ્ટાફની બેદરકારીએ લીધો નિર્દોષનો જીવ
ઘટનાના દિવસે, મારિયા પહેલા ત્રણ વ્યક્તિઓએ સફળતાપૂર્વક કૂદકો માર્યો હતો, પરંતુ મારિયાના વારો આવ્યો ત્યારે કંપનીના સ્ટાફે ગંભીર બેદરકારી દાખવી હતી. પ્રશિક્ષકોએ તેને કૂદવાનો સંકેત આપતા પહેલા સલામતી તપાસ કરવાની સામાન્ય પ્રક્રિયા પણ કરી નહોતી. જેવું મારિયાએ ૩૫ મીટર (આશરે ૧૧૫ ફૂટ)ની ઊંચાઈએથી કૂદકો માર્યો, ત્યારે હાજર લોકોના રૂંવાડા ઉભા થઈ ગયા હતા. મારિયાના પગ કે શરીર સાથે સુરક્ષા માટેનું દોરડું જોડાયેલું જ નહોતું. તે સીધી જમીન પર પટકાઈ અને તેનું ઘટનાસ્થળે જ કરુણ મૃત્યુ થયું.
ઘટના બાદ સ્થળ પર અફરાતફરી મચી ગઇ
આ ઘટના બાદ સ્થળ પર અફરાતફરી મચી ગઈ હતી. ભયાનક ભૂલ સમજાતા કંપનીના સ્ટાફ અને પ્રશિક્ષકો ત્યાંથી ભાગવાની કોશિશ કરવા લાગ્યા હતા, પરંતુ સ્થાનિક પોલીસે સમયસૂચકતા વાપરી તેમને અટકાવ્યા હતા. અત્યાર સુધીમાં આ મામલે ૬ લોકોની ધરપકડ કરવામાં આવી છે. આ અકસ્માતે સોશિયલ મીડિયાના યુગમાં સાહસિક પ્રવૃત્તિઓ કરતી વખતે સુરક્ષાના નિયમોનું પાલન કેટલું અનિવાર્ય છે, તે અંગે ગંભીર પ્રશ્નો ઉભા કર્યા છે. એક નાનકડી બેદરકારીએ હસતા-રમતા પરિવારમાં માતમ છવાઈ દીધો છે. આ દુર્ઘટના માત્ર કંપનીની બેદરકારી નથી, પરંતુ સત્તાવાળાઓ દ્વારા યોગ્ય નિયમનનો અભાવ પણ દર્શાવે છે.
આ પણ વાંચોઃ Apple: શું સિરી બનશે તમારી 'AI ગર્લફ્રેન્ડ'? એપલનો આ જવાબ સાંભળીને તમે પણ ચોંકી ઉઠશો!
