સોનું ખરીદતી વખતે મોટાભાગના લોકો તેની ચમક અને કિંમત પર ધ્યાન આપે છે, પરંતુ અસલી સોનાની ઓળખ માટે માત્ર ચમક જોઈને નિર્ણય લેવો યોગ્ય નથી. સોનાની શુદ્ધતા તપાસવા માટે હોલમાર્ક અને HUID નંબર જોવો ખૂબ જરૂરી છે.
ચેન્નાઈમાં BIS દ્વારા કરવામાં આવેલી મોટી કાર્યવાહીમાં હોલમાર્ક વગરની સોનાની જ્વેલરી જપ્ત કરવામાં આવી છે.
1 સપ્ટેમ્બર 2026ના રોજ ચેન્નાઈના અંબત્તુર વિસ્તારમાં BIS દ્વારા કાર્યવાહી કરવામાં આવી હતી. આ દરમિયાન કુલ 803.99 ગ્રામ હોલમાર્ક વગરની સોનાની જ્વેલરી જપ્ત કરવામાં આવી છે. કાર્યવાહીમાં સોનાની નાની-મોટી કુલ 237 જ્વેલરી આઇટમ જપ્ત કરવામાં આવી છે. હાલમાં સોનું ઘણું મોંઘું છે અને મોટી સંખ્યામાં લોકો રોકાણની સાથે સોનાની જ્વેલરી પણ ખરીદી રહ્યા છે.
અહીં એક વાત સમજવી જરૂરી છે કે હોલમાર્ક વગરની જ્વેલરીને સીધું જ નકલી સોનું કહી શકાય નહીં, પરંતુ આવી જ્વેલરી ખરીદતી વખતે તેની શુદ્ધતા અંગે સાવચેત રહેવું ખૂબ જરૂરી છે. હોલમાર્ક સોનાની શુદ્ધતા ઓળખવામાં મદદ કરે છે. તેથી જ્વેલરી ખરીદતી વખતે ગ્રાહકે તેના પર જરૂરી હોલમાર્ક અને HUID સાથે જોડાયેલી માહિતી છે કે નહીં તે જરૂર તપાસવું જોઈએ.
આજના સમયમાં સોનાની જ્વેલરી ખરીદતી વખતે HUID કોડ ચેક કરવો ખૂબ જરૂરી છે. આ એક યુનિક કોડ છે, જેની મદદથી હોલમાર્કવાળી જ્વેલરીની માહિતી અને તેની શુદ્ધતા સાથે જોડાયેલી વિગતો વેરિફાય કરી શકાય છે. તેથી માત્ર દુકાનદારની વાત પર ભરોસો કરીને સોનું ખરીદવાને બદલે ગ્રાહકે પોતે પણ જ્વેલરી પર રહેલો હોલમાર્ક અને HUID ચેક કરવો જોઈએ.
જો તમે સોનાની જ્વેલરી ખરીદવા જઈ રહ્યા છો તો કેટલીક બાબતોનું ધ્યાન રાખો. સૌથી પહેલા જ્વેલરી પર BISનું સ્ટાન્ડર્ડ માર્ક જુઓ. ત્યારબાદ સોનાની શુદ્ધતા સાથે જોડાયેલી માહિતી અને HUID કોડ જરૂર ચેક કરો. આ ઉપરાંત બિલ લેતી વખતે તેમાં સોનાની શુદ્ધતા, વજન અને કિંમત જેવી જરૂરી માહિતી ચોક્કસ લખાવડાવો.