15 સપ્ટેમ્બરે સરકારે જાહેરાત કરી હતી કે હવે UPI પેમેન્ટ પર 0.4 ટકા MDR ચાર્જ લાગશે. ત્યારથી જ દુકાનદારો અને વેપારી સંગઠનો તેનો વ્યાપક વિરોધ કરી રહ્યા છે. હવે દેશભરના મોબાઇલ ફોન રિટેલર્સે જાહેરાત કરી છે કે તેઓ 2 ઓક્ટોબરે આ નિર્ણયના વિરોધમાં દેશવ્યાપી પ્રદર્શન કરશે.
આ અંતર્ગત તેઓ 2 ઓક્ટોબરે ગાંધી જયંતીના દિવસે ‘No UPI Day’ મનાવશે. ઓલ ઇન્ડિયા મોબાઇલ રિટેલર્સ એસોસિએશન (AIMRA)એ આ વિરોધનું આહ્વાન કર્યું છે.
2 ઓક્ટોબરે ગાંધી જયંતીના દિવસે વિરોધ પ્રદર્શનમાં જોડાવા માટે મોબાઇલ દુકાનદારો UPI મારફતે પેમેન્ટ લેવાનું બંધ કરી શકે છે. આ ઉપરાંત દુકાનો પર લગાવવામાં આવેલા UPI QR કોડને કાળા કપડાથી ઢાંકીને પ્રતિકાત્મક વિરોધ કરવામાં આવશે.
દુકાનદારોનું કહેવું છે કે તેમનો વિરોધ UPI અથવા ડિજિટલ પેમેન્ટની વ્યવસ્થા સામે નથી, પરંતુ નવા ચાર્જ સામે છે.
AIMRAનું કહેવું છે કે જો દેશમાં ડિજિટલ પેમેન્ટ અને ડિજિટલ ઇન્ડિયાને પ્રોત્સાહન આપવું હોય તો UPI દુકાનદારો માટે Zero MDR એટલે કે કોઈપણ ચાર્જ વિના ચાલુ રાખવું જોઈએ.
એસોસિએશને નાણાંમંત્રી નિર્મલા સીતારમણને પણ આ ચાર્જ અંગે ફરી વિચાર કરવા અને નાના તથા મધ્યમ મોબાઇલ દુકાનદારોને રાહત આપવાની માંગ કરી છે.
AIMRAનું કહેવું છે કે મોબાઇલ ફોન ખરીદવા માટે કરવામાં આવતા મોટાભાગના પેમેન્ટ ₹2,000થી વધુના હોય છે. આવી સ્થિતિમાં 0.4 ટકાના ચાર્જની સીધી અસર દુકાનદારોની આવક પર પડી શકે છે.
એસોસિએશનના જણાવ્યા અનુસાર, જો કોઈ નાનો દુકાનદાર દર મહિને UPI મારફતે ₹5 લાખથી ₹30 લાખ સુધીનો વેપાર કરે છે, તો તેને દર મહિને આશરે ₹2,000થી ₹12,000 સુધીનો વધારાનો ખર્ચ ઉઠાવવો પડી શકે છે.
જણાવી દઈએ કે સરકારની જાહેરાત મુજબ નવા UPI-MDR ચાર્જ 15 ઓક્ટોબરથી લાગુ થવાના છે. આ તારીખથી જ્યારે પણ કોઈ ગ્રાહક ₹2,000થી વધુનું પેમેન્ટ કરશે ત્યારે તેના પર 0.4 ટકા MDR લાગશે.
જોકે, વ્યક્તિથી વ્યક્તિ એટલે કે P2P પેમેન્ટ પર આ ચાર્જ લાગશે નહીં. ₹2,000 સુધીના નાના UPI પેમેન્ટને પણ આ ચાર્જમાંથી બહાર રાખવામાં આવ્યા છે.