Coldriff Cough Syrup Ban : હિમાચલ પ્રદેશમાં પણ કફસિરપ પર મુકાયો પ્રતિબંધ, Nastro-DSનું પ્રોડક્શન અને વેચાણ ના કરવા નિર્દેશ

કફસિરપ કેસને લઈને હિમાચલ પ્રદેશ સરકારે કડક નિર્ણય લીધો છે. તમિલનાડુની કંપની દ્વારા બનાવવામાં આવતી Coldriff કફસિરપમાં Diethylene Glycolની વધારે માત્રાની પુષ્ટી મધ્યપ્રદેશના ટેસ્ટિંગમાં આવ્યા બાદ સમગ્ર હિમાચલ પ્રદેશમાં પણ Coldriff કફસિરપના વેચાણ પર પ્રતિબંધ મુકી દીધો છે. હિમાચલ પ્રદેશમાં આ સિરપના પ્રિસ્ક્રિપ્શન લખવા અને વેચવા પર સંપૂર્ણ રીતે પ્રતિબંધ લગાવવામાં આવ્યો છે.

તાત્કાલિક પ્રોડક્શન અટકાવી દેવામાં આવ્યું

Nastro-DS નામની કફ સિરપ હિમાચલ પ્રદેશના બદ્દી ઈન્ડસ્ટ્રિયલ એરિયામાં Aquinova નામની કંપની દ્વારા બનાવવામાં આવે છે. તે કંપનીને પણ તાત્કાલિક આ કફ સિરપના પ્રોડક્શન અને સેલને રોકવાના નિર્દેશ આપવામાં આવ્યા છે. જો કે અત્યાર સુધીમાં મધ્યપ્રદેશ સરકાર કે કોઈ કેન્દ્રીય એજન્સી દ્વારા Nastro-DS કફ સિરપમાં હાનિકારક પદાર્થ હોવાની પુષ્ટી હિમાચલ પ્રદેશ સરકારના ડ્રગ્સ વિભાગને મળી નથી. આ કારણે Nastro-DS કફ સિરપ પર હજુ કોઈ કડક કાર્યવાહી હિમાચલ પ્રદેશમાં કરવામાં આવી નથી. માત્ર તાત્કાલિક પ્રોડક્શન અટકાવી દેવામાં આવ્યું છે. કંપનીએ પણ ફાઈનલ રિપોર્ટસ આવે ત્યાં સુધી કફ સિરપની સપ્લાયને રોકવાનો વિશ્વાસ હિમાચલ પ્રદેશ સરકારના ડ્રગ્સ વિભાગને આપ્યો છે.

રાજ્યના ડ્રગ્સ વિભાગે તાત્કાલિક પગલા લીધા

બીજી તરફ કર્ણાટકમાં એલર્ટ જાહેર કરવામાં આવ્યું છે. રાજ્યના સ્વાસ્થ્ય મંત્રી દિનેશ ગુંડૂ રાવે કહ્યું કે મધ્યપ્રદેશ અને રાજસ્થાનમાં બાળકોના મોતના સમાચાર બાદ રાજ્યમાં એલર્ટ જાહેર કરવામાં આવ્યું છે. મુખ્યપ્રધાન સિદ્ધારમૈયાએ સ્વાસ્થ્ય વિભાગને આ કેસની તપાસ કરવાનો નિર્દેશ આપ્યો છે. સ્વાસ્થ્ય મંત્રીએ માતા-પિતાને અપીલ કરતા કહ્યું કે 5 વર્ષથી ઓછી ઉંમરના બાળકોને કોઈ પણ સિરપ આપતા પહેલા સાવધાની રાખવાની અપીલ કરી છે. તેમને કહ્યું કે અમે અધિકારીઓને પહેલા જ તપાસ કરવાના આદેશ આપી દીધા છે કે શું તેમાંથી કોઈ ઉત્પાદનનું કર્ણાટકમાં વેચાણ થયું છે. જ્યાં સુધી અમને જાણકારી છે ત્યાં સુધી ઉત્પાદન રાજ્યમાં આવ્યું નથી. તાત્કાલિક તમામ બ્રાન્ડની કફસિરપના સેમ્પલ લઈને તપાસ કરવામાં આવી રહી છે. રાજ્યના ડ્રગ્સ વિભાગે તાત્કાલિક પગલા લીધા છે. કર્ણાટક આ પ્રકારની દવાની ગુણવતા તપાસ કરનારૂ દેશનું અગ્રણી રાજ્યમાંથી એક છે.