દિલ્હી પોલીસે નશાના કારોબારી પર મોટી કાર્યવાહી કરતા ઉત્તર-પશ્ચિમ દિલ્હીમાં ડ્રગ્સ સિન્ડીકેટનો પર્દાફાશ કર્યો છે. પોલીસે એક ગાડીમાંથી લગભગ 400 ગ્રામ નશીલો પદાર્થ જપ્ત કરીને બે ડ્રગ્સ પેડલર્સની ધરપકડ કરી છે. જપ્ત કરેલા ડ્રગ્સની આંતરરાષ્ટ્રીય બજારમાં કિંમત 1 કરોડ રૂપિયાથી વધારે આંકવામાં આવી રહી છે.
ગાડીમાંથી ગેરકાયદેસર ખેપ લઈને જઈ રહ્યા હતા
પોલીસના જણાવ્યા મુજબ ધરપકડ કરેલા આરોપીઓની ઓળખ જસવંત સિંહ ઉર્ફ લલ્લુ અને અશોક કુમાર તરીકે થઈ છે. બંને સુલ્તાનપુરી વિસ્તારના રહેવાસી છે. શુક્રવારે પોલીસે તેમને તે સમયે દબોચ્યા, જ્યારે તે ગાડીમાંથી ગેરકાયદેસર ખેપ લઈને જઈ રહ્યા હતા. પોલીસની ટીમે રોહિણીના નાહરપુર બસ સ્ટેન્ડની પાસે જાળ ફેલાવી હતી. સર્વેલન્સ દરમિયાન શંકાસ્પદ SUV ગાડી આવતી જોવા મળી, જેને રોકીને તપાસ કરવામાં આવી અને પુછપરછ દરમિયાન બંને આરોપી પોલીસને ગેરમાર્ગે દોરવાનો પ્રયત્ન કરતા રહ્યા. શંકા થવા પર જ્યારે ગાડીની તપાસ કરવામાં આવી તો સ્ટીયરિંગ વ્હીલની નીચે બનાવેલી જગ્યામાંથી 383 ગ્રામ સ્મેક અને હેરોઈનનું પેકેટ જપ્ત થયું.
