ઉત્તર પ્રદેશના કાનપુરમાં નેટવર્ક માર્કેટિંગના નામે કરોડોની ઠગાઈ કરનાર ગેંગનો પોલીસે પર્દાફાશ કર્યો છે. હનુમંત વિહાર પોલીસ અને ક્રાઈમ બ્રાન્ચની સંયુક્ત ટીમે ‘વિન મેકર આયુર્વેદા પ્રાઇવેટ લિમિટેડ’ નામથી ચલાવવામાં આવી રહેલા ફેક નેટવર્ક સાથે જોડાયેલા 6 આરોપીઓની ધરપકડ કરી છે.
https://twitter.com/kanpurnagarpol/status/2079173888546902422
પોલીસ તપાસમાં સામે આવ્યું છે કે આરોપીઓ દેશના અલગ-અલગ રાજ્યોમાંથી બેરોજગાર યુવકોને નોકરી અને વધુ કમાણીનું લાલચ આપી કાનપુર બોલાવતા હતા. ત્યારબાદ પિરામિડ ચેઈન સિસ્ટમ દ્વારા લોકોને જોડીને તેમની પાસેથી મોટી રકમ વસૂલવામાં આવતી હતી. અંદાજ મુજબ આ ગેંગે લગભગ 60,000 લોકોને શિકાર બનાવી 100 કરોડ રૂપિયાથી વધુની ઠગાઈ કરી હોવાની આશંકા છે.
આરોપીઓ લોકો પાસેથી કંપનીમાં જોડાવાના નામે 15,000થી 30,000 રૂપિયા સુધીની રકમ લેતા હતા. કેટલાક કિસ્સામાં એક જ વ્યક્તિની બે અલગ-અલગ આઈડી બનાવી પ્રતિ આઈડી 12,000 રૂપિયા વસૂલવામાં આવતા હતા. બાદમાં સભ્યો પર વધુ લોકોને જોડવાનું દબાણ કરવામાં આવતું હતું. પોલીસને એવી પણ માહિતી મળી છે કે કંપની દ્વારા આપવામાં આવતા કેટલાક હેલ્થ અને ડેઈલી યુઝ પ્રોડક્ટ્સ જરૂરી લાઈસન્સ વગર તૈયાર કરવામાં આવતા હતા. આ પ્રોડક્ટ્સની ગુણવત્તા અને લોકોના સ્વાસ્થ્ય પર પડેલી અસર અંગે પણ તપાસ ચાલી રહી છે.
કાર્યવાહી દરમિયાન પોલીસે આરોપીઓ પાસેથી 6 મોબાઈલ ફોન, એક સીપીયુ, 3,600 રૂપિયા રોકડ અને ઠગાઈ સાથે જોડાયેલા મહત્વપૂર્ણ દસ્તાવેજો જપ્ત કર્યા છે. હાલ પોલીસ કંપનીના બેંક ખાતા, એજન્ટો અને કુલ ઠગાઈની રકમ અંગે વધુ તપાસ કરી રહી છે.