કેન્દ્રીય તપાસ બ્યુરો (CBI)એ ઉત્તરાખંડના ચર્ચિત LUCC (લોની અર્બન મલ્ટી સ્ટેટ ક્રેડિટ એન્ડ થ્રિફ્ટ કો-ઓપરેટિવ સોસાયટી) ચિટફંડ કૌભાંડમાં મોટી કાર્યવાહી કરતાં મુખ્ય આરોપી સમીર અગ્રવાલ સહિત 18 આરોપીઓ અને એક સંસ્થા સામે દેહરાદૂનની વિશેષ કોર્ટમાં ચાર્જશીટ દાખલ કરી છે. આરોપીઓ સામે ભારતીય દંડ સંહિતા (IPC), ભારતીય ન્યાય સંહિતા (BNS), ઉત્તરાખંડ રોકાણકાર હિત સંરક્ષણ કાયદો તથા BUDS એક્ટ, 2019 હેઠળ વિવિધ ગુનાઓ નોંધવામાં આવ્યા છે.

50થી વધુ શાખાઓ મારફતે મોટી રકમ એકત્ર કરી

CBIના જણાવ્યા મુજબ, ઉત્તરાખંડ હાઈકોર્ટના આદેશ બાદ વર્ષ 2025માં LUCC કૌભાંડની તમામ ફરિયાદોની તપાસ એજન્સીને સોંપવામાં આવી હતી. ત્યારબાદ 26 નવેમ્બર, 2025ના રોજ CBIએ કેસ નોંધ્યો અને રાજ્યના વિવિધ પોલીસ સ્ટેશનોમાં નોંધાયેલી 18 FIRની તપાસ પોતાના હાથમાં લીધી. તપાસ દરમિયાન ખુલાસો થયો કે LUCC સોસાયટીનું રજિસ્ટ્રેશન વર્ષ 2012માં થયું હતું. વર્ષ 2016માં સમીર અગ્રવાલે સંસ્થાનું સંચાલન સંભાળી નવું બોર્ડ બનાવ્યું અને ઉત્તરાખંડમાં 50થી વધુ શાખાઓ મારફતે વિવિધ રોકાણ યોજનાઓના નામે લોકો પાસેથી મોટી રકમ એકત્ર કરી.

હજારો રોકાણકારો પાસે છેતરપિંડી કરવામાં આવી હોવાનો આરોપ

CBIના આરોપ મુજબ, સંસ્થાએ સત્તાવાર મંજૂરી મળ્યા પહેલાં જ કામગીરી શરૂ કરી હતી. ઉપરાંત, સંસ્થા પાસે કોઈ વાસ્તવિક વ્યવસાય કે આવકનો સ્ત્રોત નહોતો. જૂના રોકાણકારોને નવા રોકાણકારોના પૈસાથી ચૂકવણી કરવામાં આવતી હતી, જે પોન્ઝી સ્કીમની પદ્ધતિ દર્શાવે છે. આ રીતે હજારો રોકાણકારો સાથે છેતરપિંડી કરવામાં આવી હોવાનો આરોપ છે.

39 સંપત્તિઓની ઓળખ કરવામાં આવી

તપાસ માટે CBIએ વિશેષ તપાસ ટીમ (SIT) બનાવી છે. ઉત્તરાખંડ, ઉત્તર પ્રદેશ અને મહારાષ્ટ્રમાં આરોપીઓ સાથે સંકળાયેલી 39 સંપત્તિઓની ઓળખ કરવામાં આવી છે. તેમાંની 29 સંપત્તિઓને અસ્થાયી રીતે જપ્ત કરવાનો આદેશ આપવામાં આવ્યો છે, જ્યારે બાકીની 10 સંપત્તિઓ સામે કાયદાકીય કાર્યવાહી ચાલુ છે. હવે આ સમગ્ર મામલે વિશેષ કોર્ટમાં સુનાવણી હાથ ધરાશે.

આ પણ વાંચો : Corona Virus: કોરોનાનું ખતરનાક કમબેક! આંધ્રપ્રદેશમાં 2 લોકોના મોત બાદ મચ્યો ખળભળાટ