આસામના પ્રખ્યાત અને લોકપ્રિય ગાયક ઝુબિન ગર્ગના મૃત્યુ કેસમાં એક નવો વળાંક આવ્યો છે. તેમના બેન્ડના એક સભ્યે કાવતરું અને ઝેર આપવાના ચોંકાવનારા આરોપો લગાવ્યા છે. સીએનએન ન્યુઝ 18ના ના એક અહેવાલમાં, બેન્ડ સભ્યની જુબાની અને રિમાન્ડ નોટને ટાંકીને, લોકપ્રિય ગાયક વિરુદ્ધ કાવતરું ઘડવામાં આવ્યું હતું અને તેમના મૃત્યુને છુપાવવાનું નિષ્ફળ કાવતરું ઘડવામાં આવ્યું હતું તેમ જણાવાયું છે.
સિદ્ધાર્થ શર્મા અને શ્યામકાનુ મહંત પર ઝુબિન ગર્ગને ઝેર આપવાનો આરોપ
અહેવાલમાં જણાવાયું છે કે કેસના મુખ્ય સાક્ષી અને બેન્ડ સભ્ય શેખર જ્યોતિ ગોસ્વામીએ બે વ્યક્તિઓ, સિદ્ધાર્થ શર્મા અને શ્યામકાનુ મહંત પર ઝુબિન ગર્ગને ઝેર આપવાનો આરોપ લગાવ્યો છે.
મૃત્યુને આકસ્મિક બતાવવા માટે વિદેશી દેશ પસંદ કરવામાં આવ્યો
ગોસ્વામીએ કેસની તપાસ કરી રહેલી સ્પેશિયલ ઇન્વેસ્ટિગેશન ટીમ સમક્ષ દાવો કર્યો હતો કે હત્યા છુપાવવા અને મૃત્યુને આકસ્મિક બતાવવા માટે વિદેશી દેશ પસંદ કરવામાં આવ્યો હતો. સ્પેશિયલ ઇન્વેસ્ટિગેશન ટીમે શુક્રવારે નોર્થ ઇસ્ટ ઇન્ડિયા ફેસ્ટિવલ આયોજક ટીમના ત્રણ સભ્યોની પૂછપરછ કરી હતી જેમાં શેખર જ્યોતિ ગોસ્વામીનો પણ સમાવેશ થાય છે. કોર્ટે ગર્ગ સાથે સિંગાપોર ગયેલા આ ત્રણ વ્યક્તિઓને 14 દિવસની પોલીસ કસ્ટડીમાં મોકલી દીધા છે.
ગોસ્વામીના આરોપો શું છે?
રિપોર્ટમાં જણાવાયું છે કે બેન્ડના સભ્ય શેખર જ્યોતિ ગોસ્વામીએ દાવો કર્યો હતો કે તેમણે સિંગાપોરમાં સિદ્ધાર્થ શર્માને શંકાસ્પદ પ્રવૃત્તિઓમાં રોકાયેલા જોયા હતા અને આરોપ લગાવ્યો હતો કે શર્માએ બળજબરીથી યાટનો કબજો લીધો હતો અને ઇરાદાપૂર્વક સાથી મુસાફરોને જોખમમાં મૂક્યા હતા. તેમણે આરોપ લગાવ્યો હતો કે ઝુબિન ડૂબી રહ્યો હતો અને તકલીફમાં હતો ત્યારે શર્મા કથિત રીતે "જબો દે, જબો દે" (તેને જવા દો) બૂમો પાડી રહ્યો હતો, ગાયકના મોં અને નાકમાંથી ફીણ નીકળી રહ્યું હતું.
મૃત્યુને છુપાવવાના આરોપો
ગોસ્વામીએ સિદ્ધાર્થ શર્મા પર બેદરકારી અને મામલો છુપાવવાનો પણ આરોપ લગાવ્યો હતો. તેમણે કહ્યું હતું કે ગર્ગના મોંમાંથી ફીણ નીકળવા જેવા ગંભીર લક્ષણો જોવા છતાં, તેમણે તાત્કાલિક તબીબી સહાય પૂરી પાડવામાં નિષ્ફળ રહ્યા અને તેને ફક્ત "એસિડ રિફ્લક્સ" ગણાવીને ફગાવી દીધો. ગોસ્વામી કહે છે કે આ બેદરકારીને કારણે ઝુબિનનું મૃત્યુ થયું.
ઝુબિન ગર્ગ એક તરવૈયા હતા.
ગોસ્વામીએ ભારપૂર્વક જણાવ્યું હતું કે ઝુબિન ગર્ગ એક કુશળ તરવૈયા હતા અને કુદરતી રીતે ડૂબીને મૃત્યુ પામ્યા ન હતા, જેનાથી તેમનું મૃત્યુ આકસ્મિક ન હોવાની માન્યતા વધુ મજબૂત બની. તેમણે આરોપ લગાવ્યો હતો કે શર્માએ કથિત રીતે બોટ અકસ્માતના કોઈપણ વિડિયો ફૂટેજ કોઈની સાથે શેર ન કરવા માટે કડક સૂચનાઓ આપી હતી. રિપોર્ટ અનુસાર, જ્યારે SIT એ શર્માને આ મુદ્દાઓ પર પૂછપરછ કરી, ત્યારે શર્મા કથિત રીતે ગાયક બીમાર પડતા પહેલા તેના માટે ગોઠવાયેલા દારૂ અંગે સંતોષકારક જવાબો આપી શક્યા નહીં.
ઝુબિન ગર્ગનું 19 સપ્ટેમ્બરના રોજ સિંગાપોરમાં અવસાન થયું
ગાયક ઝુબિન ગર્ગ ભારત-સિંગાપોર રાજદ્વારી સંબંધોની 60મી વર્ષગાંઠ અને ભારત-આસિયાન પ્રવાસન વર્ષની ઉજવણી માટે સિંગાપોરની પેન પેસિફિક હોટેલમાં પહોંચ્યા હતા, જ્યાં નોર્થ ઇસ્ટ ઇન્ડિયા ફેસ્ટિવલ (NEIF) યોજાવાનો હતો. જોકે, સમારંભ થાય તે પહેલાં જ 19 સપ્ટેમ્બરના રોજ તે દરિયામાં ડૂબી ગયા હતા. તેમના પોસ્ટમોર્ટમ રિપોર્ટમાં બહાર આવ્યું છે કે તેમનું મૃત્યુ સિંગાપોરના એક ટાપુ નજીક તરતા સમયે ડૂબવાથી થયું હતું.
