છત્તીસગઢ કેડરના 2022 બેચના ટ્રેની IPS અધિકારી રાહુલ બંસલ અને બે પોલીસકર્મીઓ સામે સાયબર ફ્રોડનો કેસ પતાવવાના બદલામાં રૂ.1 કરોડની લાંચ માગવાનો અને લેવાનો ગંભીર આરોપ લાગ્યો છે. IPS બનતા પહેલાં ઇન્કમ ટેક્સ ઇન્સ્પેક્ટર રહી ચૂકેલા રાહુલ બંસલની સરગુજા જિલ્લામાં CSP તરીકે પ્રથમ ફીલ્ડ પોસ્ટિંગ દરમિયાન જ આ કૌભાંડ સામે આવ્યું છે.
હવાલા મારફતે બે હપ્તામાં ચુકવાઈ લાંચની રકમ
ફરિયાદ અનુસાર, રૂ.1 કરોડની આ લાંચ એકસાથે આપવાના બદલે મે 2026માં હવાલા ચેનલ મારફતે રૂ.50-50 લાખના બે હપ્તામાં ટ્રાન્સફર કરવામાં આવી હતી. આ કૌભાંડમાં મદદગાર તરીકે ASI પ્રવીણ કુમાર રાઠોર અને કોન્સ્ટેબલ અંશુલ શર્માના નામ પણ સામેલ છે. ફરિયાદીએ આ કથિત લેવડ-દેવડ અંગેના ડિજિટલ પુરાવા જેવા કે વોટ્સએપ ચેટ્સના સ્ક્રીનશોટ અને કોલ રેકોર્ડિંગ્સ કોર્ટ સમક્ષ રજૂ કર્યા છે.