CUET UG પરીક્ષા દરમિયાન થયેલી ટેક્નિકલ ખામીને લઈને નેશનલ ટેસ્ટિંગ એજન્સી (NTA)એ પોતાની ભૂલ સ્વીકારી છે અને વિદ્યાર્થીઓ તથા પરીક્ષા કેન્દ્રોને થયેલી અસુવિધા બદલ માફી માગી છે. સંસ્થાએ સ્પષ્ટ કર્યું છે કે આ ખામી ટેક્નિકલ ગ્લીચના કારણે સર્જાઈ હતી, જેના કારણે અનેક વિદ્યાર્થીઓની પરીક્ષા પ્રભાવિત થઈ હતી. માહિતી મુજબ, સવારે યોજાયેલી પરીક્ષા દરમિયાન કેટલીક જગ્યાએ સિસ્ટમમાં ખામી આવતા વિદ્યાર્થીઓને મુશ્કેલી પડી હતી. આ ઘટનાને ગંભીરતાથી લેતા NTAએ જણાવ્યું છે કે પ્રભાવિત થયેલા તમામ વિદ્યાર્થીઓને ફરીથી પરીક્ષા આપવાની તક આપવામાં આવશે.
https://twitter.com/ANI/status/2060698256964026644
નવી તારીખ ટૂંક સમયમાં જાહેર કરવામાં આવશે
NTAના જણાવ્યા અનુસાર કુલ 3,765 વિદ્યાર્થીઓને ફરી પરીક્ષા આપવાની તક મળશે. આ વિદ્યાર્થીઓની પરીક્ષા ક્યારે યોજાશે તેની નવી તારીખો ટૂંક સમયમાં જાહેર કરવામાં આવશે. સંસ્થાએ કહ્યું છે કે પરીક્ષાની પારદર્શિતા અને ન્યાયસંગતતા જાળવવા માટે આ નિર્ણય લેવામાં આવ્યો છે. વિદ્યાર્થીઓ અને વાલીઓમાં આ ઘટનાને લઈને ચિંતા જોવા મળી હતી, કારણ કે પરીક્ષા દરમિયાન થયેલી ખામીના કારણે અનેક ઉમેદવારોનો સમય અને પ્રયાસ બગડ્યો હતો. સોશિયલ મીડિયા પર પણ આ મુદ્દે ભારે ચર્ચા જોવા મળી હતી અને NTA પર સવાલો ઉઠાવવામાં આવ્યા હતા.
સિસ્ટમને વધુ મજબૂત કરાશે
NTAએ જણાવ્યું છે કે ભવિષ્યમાં આવી ઘટનાઓ ન બને તે માટે સિસ્ટમને વધુ મજબૂત અને સુધારવામાં આવશે. ટેક્નિકલ ટીમ દ્વારા સમગ્ર ઘટનાની તપાસ પણ શરૂ કરવામાં આવી છે, જેથી ખામીના મૂળ કારણો શોધી શકાય. આ નિર્ણયથી પ્રભાવિત વિદ્યાર્થીઓને મોટી રાહત મળી છે, કારણ કે હવે તેઓને ફરીથી પરીક્ષા આપવાની તક મળશે અને તેમના ભવિષ્ય પર પડેલો અસરનો કોઈ અંશે સુધારો થઈ શકશે.
આ પણ વાંચો : Textile Sectorને મોટી રાહત, કેન્દ્ર સરકારે કપાસની આયાત પરની તમામ કસ્ટમ ડ્યુટી અસ્થાયી રૂપે હટાવી
