બંગાળની ખાડીમાં હાલ સક્રિય થયેલું ચક્રવાત 'અકવાન' (Akvan) રાજ્યના હવામાન પર અસર કરી શકે છે. હવામાન વિભાગના જણાવ્યા અનુસાર, આ ચક્રવાતી તોફાન બંગાળની ખાડીના દક્ષિણી અને તેને અડીને આવેલા પશ્ચિમ-મધ્ય ભાગોમાં સક્રિય છે. આજે, 19 નવેમ્બરના રોજ તે વધુ તીવ્ર બનીને 'ગંભીર ચક્રવાતી તોફાન' (Severe Cyclonic Storm) માં ફેરવાય તેવી શક્યતા છે.
હવામાન વિભાગના મતે આ ગંભીર ચક્રવાતી તોફાન 'અકવાન' ગુરુવારે બપોર સુધીમાં ઉત્તર આંધ્રપ્રદેશ (નરસપુર) અને દક્ષિણ ઓડિશા (પુરી) ના દરિયાકાંઠાના વિસ્તારોમાં ત્રાટકી શકે છે (લેન્ડફોલ કરી શકે છે). આ દરમિયાન 90 થી 110 કિમી પ્રતિ કલાકની ઝડપે ખૂબ જ તેજ પવન ફૂંકાવાની શક્યતા છે.
ટ્રેનના શેડ્યુલમાં ફેરફાર
ચક્રવાતને ધ્યાનમાં રાખીને રેલવેએ ગુરુવાર, 19 નવેમ્બર માટે ત્રણ ટ્રેનોના સમયપત્રકમાં ફેરફાર કર્યો છે. ચર્લાપલ્લી-શાલીમાર ઈસ્ટ કોસ્ટ એક્સપ્રેસ (18046) હવે સવારે 8:40 ને બદલે બપોરે 3:40 વાગ્યે ઉપડશે. સિકંદરાબાદ-હાવડા ફલકનુમા એક્સપ્રેસ (12704) હવે બપોરે 3:55 ને બદલે સાંજે 5:55 વાગ્યે ઉપડશે. આ ઉપરાંત, એસએમવીટી (SMVT) બેંગલુરુ-મુઝફ્ફરપુર એક્સપ્રેસ (15227) હવે મધ્યરાત્રિએ 12:30 ને બદલે સવારે 8:30 વાગ્યે ઉપડશે. સમયપત્રકમાં આ ફેરફારો ચક્રવાતને કારણે કરવામાં આવ્યા છે.
શાળાઓ બંધ
સાવચેતીના પગલા રૂપે, ઓડિશા સરકારે રાજ્યના છ જિલ્લાઓમાં 19 થી 21 નવેમ્બર સુધી તમામ સરકારી અને ખાનગી શાળાઓ તેમજ આંગણવાડી કેન્દ્રો બંધ રાખવાનો આદેશ આપ્યો છે.
ઓડિશાના મુખ્યમંત્રી મોહન ચરણ માઝીએ જણાવ્યું હતું કે રાજ્યના 13 જિલ્લાઓ માટે ભારે વરસાદને લઈને 'રેડ એલર્ટ' જાહેર કરવામાં આવ્યું છે. ભારતીય નૌકાદળ અને વહીવટી ટીમો હાઈ એલર્ટ પર છે અને કોઈપણ કટોકટીની પરિસ્થિતિને પહોંચી વળવા માટે તૈયારીઓ પૂર્ણ કરી લેવામાં આવી છે. તેની સૌથી વધુ અસર દક્ષિણ ઓડિશા અને દરિયાકાંઠાના વિસ્તારોમાં જોવા મળી શકે છે. મલકાનગિરી, કોરાપુટ, રાયગડા અને કાલાહાંડી સહિતના અનેક જિલ્લાઓમાં ભારે વરસાદની આગાહી કરવામાં આવી છે. બાલાસોર સુધીના દરિયાકાંઠાના વિસ્તારોમાં હવામાનની સ્થિતિ પ્રતિકૂળ રહી શકે છે.
આ પણ વાંચો: Azam Khanના વચગાળાના જામીન વિરુદ્ધ EDની અરજી ફગાવી, સુપ્રીમ કોર્ટે દખલ કરવાનો કર્યો ઈનકાર