દેશના હવામાનમાં ફરી એકવાર મોટો પલટો જોવા મળી રહ્યો છે. બંગાળની ખાડીમાં ઉભરી રહેલા એક નવા ચક્રવાતી વાવાઝોડા અને નીચા દબાણના ક્ષેત્રને કારણે દેશના અનેક રાજ્યોમાં ભારે વરસાદ અને તોફાની પવન ફૂંકાવાની શક્યતા છે. હવામાન વિભાગ (IMD)ના જણાવ્યા અનુસાર, દક્ષિણપૂર્વ બંગાળની ખાડી અને તેની આસપાસના આંદામાન સમુદ્ર પર બનેલા આ સિસ્ટમના પ્રભાવ હેઠળ ચક્રવાત આગામી ૨ નવેમ્બરની સાંજ સુધીમાં આંધ્રપ્રદેશના દરિયાકાંઠે પહોંચી શકે છે. આ કુદરતી આપત્તિની સંભાવનાને ધ્યાનમાં રાખીને ઓડિશા, આંધ્રપ્રદેશ, અરુણાચલ પ્રદેશ અને કેરળ સહિતના અનેક રાજ્યોમાં 'યલો એલર્ટ' જારી કરવામાં આવ્યું છે.
વિવિધ રાજ્યોમાં ભારે વરસાદ અને વાવાઝોડાની આગાહી
હવામાન વિભાગના તાજેતરના બુલેટિન મુજબ, આગામી થોડા દિવસો સુધી દક્ષિણ, પૂર્વ અને ઉત્તરપૂર્વ ભારતના વિવિધ વિસ્તારોમાં વરસાદી માહોલ યથાવત રહેશે. રવિવારે અરુણાચલ પ્રદેશ, દરિયાકાંઠાના આંધ્રપ્રદેશ, કેરળ અને માહેમાં છૂટાછવાયા સ્થળોએ ભારે વરસાદ પડી શકે છે. ઓડિશામાં વીજળીના કડાકા-ભડાકા સાથે ૪૦ થી ૫૦ કિમી પ્રતિ કલાકની ઝડપે તોફાની પવન ફૂંકાવાની શક્યતા છે. આ ઉપરાંત આંધ્રપ્રદેશ, આંતરિક કર્ણાટક, તેલંગાણા, છત્તીસગઢ, પૂર્વી મધ્યપ્રદેશ, તમિલનાડુ અને વિદર્ભના કેટલાક ભાગોમાં ૩૦ થી ૪૦ કિમી પ્રતિ કલાકની ઝડપે પવન ફૂંકાવવાની સાથે ભારે વાવાઝોડા અને વીજળી પડવાની ચેતવણી આપવામાં આવી છે.