નવી દિલ્હીમાં યોજાયેલા BRICS Summit 2026 દરમિયાન વડાપ્રધાન નરેન્દ્ર મોદીએ બ્રિક્સ નેતાઓ માટે ખાસ રાત્રિભોજનનું આયોજન કર્યું હતું. ભારત મંડપમ ખાતે યોજાયેલા આ ડિનરમાં મહેમાનોને પરંપરાગત ભારતીય વાનગીઓ સાથે મિલેટઆધારિત શાકાહારી ભોજન પીરસવામાં આવ્યું હતું.
ખાંડવીથી ખુમ્બ ગલૌટી સુધીના ખાસ સ્ટાર્ટર
રાત્રિભોજનના મેન્યૂમાં સ્ટાર્ટર તરીકે ખાંડવી મિલ-ફુઈ અને ખુમ્બ ગલૌટી સામેલ હતા. ખાંડવીને રાઈ, નાળિયેર અને કઢીપત્તાના વઘાર સાથે પીરસવામાં આવી હતી, જ્યારે ખુમ્બ ગલૌટીમાં નરમ મશરૂમ કબાબને શીરમલ રોટી સાથે પીરસવામાં આવ્યા હતા.
પનીર લબાબદાર અને ગુચ્છી માર્બિકે વધાર્યો સ્વાદ
મુખ્ય ભોજનમાં પનીર લબાબદાર, હિમાલયન ગુચ્છી મશરૂમ અને શતાવરીથી બનેલી ગુચ્છી માર્બિક, ગાજર-ફળી પોરિયલ, ટમેટા બેલ્લે સારુ અને બીટરૂટ રાયતું સામેલ હતું. સાથે વિવિધ પ્રકારની ભારતીય રોટલીઓ પણ પીરસવામાં આવી હતી.
https://twitter.com/ANI/status/2098793498921304305
‘શ્રી અન્ન’ને મેન્યૂમાં ખાસ સ્થાન
આ ડિનરની ખાસિયત મિલેટ આધારિત વાનગીઓ હતી. મેન્યૂમાં ત્રણ પ્રકારના મોટાં અનાજનો ઉપયોગ કરવામાં આવ્યો હતો. બાજરાનો ઉપયોગ મિલેટ પુલાવમાં, જ્વારનો ભારતીય બ્રેડમાં અને સાંવાનો ઉપયોગ મીઠાઈમાં કરવામાં આવ્યો હતો.
જલેબી અને શહતૂત ફરણીથી મીઠો અંત
મીઠાઈમાં જૂની દિલ્હીની ફ્રૂટ ક્રીમ વિથ જલેબી અને શહતૂત ફરણી પીરસવામાં આવી હતી. ફળો, ક્રીમ, જલેબી અને શહતૂતથી સજાવેલી આ મીઠાઈઓએ ભારતીય પરંપરાગત સ્વાદને શાહી અંદાજમાં રજૂ કર્યો હતો. મેન્યૂ કાર્ડ અંગ્રેજી અને હિન્દી બંને ભાષામાં તૈયાર કરવામાં આવ્યું હતું અને તેમાં પરંપરાગત ભારતીય ડિઝાઇનવાળી બોર્ડર પણ બનાવવામાં આવી હતી.
