દેશની રાજધાની દિલ્હીમાં જંતર-મંતર ખાતે કોકરોચ જનતા પાર્ટી (CJP) દ્વારા કરવામાં આવી રહેલા વિરોધ પ્રદર્શનને કારણે દિલ્હીનું અર્થતંત્ર અને વેપાર ભારે સંકટમાં મુકાયા છે. તહેવારોની મોસમની શરૂઆતમાં જ બજારોમાં ગ્રાહકોની ગેરહાજરી અને કડક સુરક્ષા પ્રતિબંધોને પગલે દિલ્હીના વેપારીઓને મોટું આર્થિક નુકસાન વેઠવાનો વારો આવ્યો છે. દેશના વેપારીઓ અને ઉદ્યોગસાહસિકોના સર્વોચ્ચ સંગઠન 'ચેમ્બર ઓફ ટ્રેડ એન્ડ ઇન્ડસ્ટ્રી' (CTI) ના જણાવ્યા અનુસાર, 10 ઓક્ટોબરના રોજ થયેલા આ વિરોધ પ્રદર્શનને કારણે માત્ર એક જ દિવસમાં દિલ્હીમાં અંદાજે ₹2,000 કરોડનો વેપાર ઠપ્પ થઈ ગયો છે.

દિવાળી સુધી વિરોધ પ્રદર્શન મુલતવી રાખવા માંગ

પરિસ્થિતિની ગંભીરતાને ધ્યાનમાં રાખીને CTI એ CJP ના નેતા અભિજીત દીપક સહિત તમામ રાજકીય પક્ષોને પત્ર લખીને અપીલ કરી છે. CTI ના અધ્યક્ષ બ્રિજેશ ગોયલે જણાવ્યું છે કે નવરાત્રી અને રામલીલા સાથે તહેવારોની મોસમ શરૂ થઈ ચૂકી છે, જે દિલ્હીના 20 લાખથી વધુ વેપારીઓ માટે વર્ષનો સૌથી મહત્વપૂર્ણ વ્યવસાયિક સમય હોય છે. જો આવા વિરોધ પ્રદર્શનો ચાલુ રહેશે, તો દિલ્હીના લાખો વેપારીઓનો વ્યવસાય સંપૂર્ણપણે બરબાદ થઈ જશે.

રામલીલાઓ પર પણ તેની વિપરીત અસર પડી

આ ઉપરાંત, દિલ્હીમાં યોજાતી 650 જેટલી રામલીલાઓ પર પણ તેની વિપરીત અસર પડી રહી છે, જેનાથી લાખો લોકોની રોજગારી જોડાયેલી છે. રસ્તાઓ અને મેટ્રો સ્ટેશનો બંધ રહેવાને કારણે લોકો રામલીલા અને બજારો સુધી પહોંચી શકતા નથી.

મુખ્ય બજારો અને સેવા ક્ષેત્ર પર ભારે અસર

10 ઓક્ટોબરે સદર બજાર, ચાંદની ચોક, ચાવરી બજાર, કનોટ પ્લેસ, કરોલ બાગ અને લાજપત રાય માર્કેટ જેવા દિલ્હીના પ્રમુખ બજારો કાં તો સંપૂર્ણ બંધ રહ્યા હતા અથવા તો નહિવત વેપાર નોંધાયો હતો.

બહારના ગ્રાહકોનો અભાવ: દરરોજ દિલ્હીમાં બહારથી આવતા 3 થી 4 લાખ ગ્રાહકો ટ્રાફિક અને સુરક્ષા ચિંતાઓને કારણે આવ્યા ન હતા.

સ્થાનિક ખરીદીમાં ઘટાડો: ટ્રાફિક જામ અને મેટ્રો સ્ટેશનો બંધ હોવાથી દિલ્હીના સ્થાનિક નાગરિકોએ પણ બહાર નીકળવાનું ટાળ્યું હતું.

સેવા ક્ષેત્ર ઠપ્પ: પેટ્રોલ પંપ ખાલી રહ્યા હતા, જ્યારે હોટલ, રેસ્ટોરન્ટ, સિનેમા હોલ અને સલુન્સમાં મોટા પાયે બુકિંગ રદ થયા હતા.

CTI એ અપીલ કરી છે કે દિલ્હીના અર્થતંત્ર અને પ્રજાની સુવિધાને ધ્યાનમાં રાખીને આ આંદોલન દિવાળી સુધી મુલતવી રાખવામાં આવે અથવા અન્ય કોઈ શહેરમાં ખસેડવામાં આવે.

આ પણ વાંચોઃ CJP Protest: યુટ્યુબર ધ્રુવ રાઠીને અલ્ટીમેટમ સાથે મુક્ત કરાયો, દિલ્હીમાં વિરોધ યથાવત