કેન્દ્ર સરકારના તમામ મંત્રીઓની 2 દિવસીય ‘ચિંતન શિબિર’ બુધવારથી શરૂ થઈ છે. પ્રથમ દિવસની બેઠકમાં સરકારના કામકાજમાં સુધારા સાથે યુવાનો સુધી કલ્યાણકારી યોજનાઓનો લાભ વધુ અસરકારક રીતે કેવી રીતે પહોંચે તેના પર પણ ચર્ચા થઈ.
ચિંતન શિબિરમાં મહિલાઓ અને યુવાનો સુધી સરકારની કલ્યાણકારી યોજનાઓની પહોંચ વધારવાનો મુદ્દો મહત્વનો રહ્યો. યોજનાઓનો લાભ યોગ્ય લાભાર્થીઓ સુધી સમયસર પહોંચે અને સરકારી સેવાઓ સરળતાથી ઉપલબ્ધ બને તે અંગે પણ ચર્ચા થઈ.
બેઠક દરમિયાન કેન્દ્રીય મંત્રીઓને 8 જૂથોમાં વહેંચવામાં આવ્યા હતા. વડાપ્રધાન નરેન્દ્ર મોદીએ દરેક જૂથ સાથે અલગથી ચર્ચા કરી અને સરકારના કામકાજ સાથે જોડાયેલા વિવિધ મુદ્દાઓ પર મંત્રીઓ પાસેથી પ્રતિસાદ લીધો.
સરકારી યોજનાઓનો લાભ લોકો સુધી સમયસર પહોંચાડવા માટે મંત્રાલયો અને વિભાગો વચ્ચે વધુ સારા સંકલન પર ભાર મૂકાયો. સમય વ્યવસ્થાપન, યોજનાઓની દેખરેખ, નીતિઓનો અમલ અને જાહેર સેવાઓની ડિલિવરી પણ બેઠકના મુખ્ય મુદ્દા રહ્યા.
મંત્રીઓએ ‘જન વિશ્વાસથી જન આધાર’, સરકારના વિવિધ ક્ષેત્રોમાં સુધારા અને ‘વિકસિત ભારત@2047’ના લક્ષ્યો અંગે પણ વિચાર-વિમર્શ કર્યો. હાલની ચિંતન શિબિરને આ પ્રક્રિયાને આગળ વધારતી કડી તરીકે જોવામાં આવી રહી છે.
આ પણ વાંચો: Sandesh Digital Explainer : બે મહાશક્તિઓની થશે મુલાકાત, અમેરિકા-ચીન નજીક આવ્યા તો ભારત માટે શું બદલાશે?