દિલ્હીમાં INDIA બ્લોકની રેલી અને લોકસભામાં વિપક્ષના નેતા રાહુલ ગાંધી પર ભાજપે નિશાન સાધ્યું છે. ભાજપના સાંસદ સંબિત પાત્રાએ રાહુલ ગાંધી પર પ્રહાર કરતાં કહ્યું કે માત્ર આવી રીતો અપનાવીને કોઈ નેતા કે વડાપ્રધાન બની શકતું નથી.

‘વડાપ્રધાન’ શબ્દનો પોતાનો અર્થ સમજાવતા પાત્રાએ કહ્યું કે તેમાં ‘P’નો અર્થ પરસેવો (પસીનો) અને ‘M’નો અર્થ મહેનત થાય છે. કટાક્ષ કરતાં તેમણે કહ્યું કે ચૂંટણીનાં પરિણામો રાહુલ ગાંધીને તાંડવ યાદ અપાવશે.

રેલીમાં ભીડની સંખ્યાને લઈને કરવામાં આવેલા દાવા પર સવાલ ઉઠાવતાં પાત્રાએ કહ્યું કે INDIA ગઠબંધનમાં આટલા બધા પક્ષો અને તેમના ઝંડા એકસાથે હોવા છતાં તેઓ 10 લાખ લોકોની ભીડ એકઠી કરી શક્યા નહીં. મેદાનનો લગભગ 40 ટકા ભાગ ખાલી હતો.

પાત્રાએ વધુમાં કહ્યું કે કોંગ્રેસ અને રાહુલ ગાંધીની ટીમે રેલીમાં 10 લાખ લોકો જોડાશે એવો દાવો કર્યો હતો, પરંતુ જમીની હકીકત કંઈક અલગ હતી. તેમણે જણાવ્યું કે ભાજપ સવારથી જ INDIA ગઠબંધનની રેલી પર નજર રાખી રહ્યું હતું અને રાહુલ ગાંધીનું ભાષણ પણ ધ્યાનથી સાંભળ્યું હતું.

જોકે, અંતમાં સંબિત પાત્રાએ આ સમગ્ર કાર્યક્રમને સમયનો બગાડ ગણાવ્યો હતો. તેમણે કહ્યું કે રાહુલ ગાંધી અને તેમની ટીમે કરેલા દાવાઓથી વિપરીત, રેલીમાં હાજર ભીડની વાસ્તવિક સ્થિતિ સ્પષ્ટપણે જોઈ શકાતી હતી.

5,000થી 7,000 ખુરશીઓ ખાલી હોવાનો દાવો

ખાલી પડેલી જગ્યાઓ અને ખુરશીઓ તરફ ઈશારો કરતાં ભાજપના સાંસદે કહ્યું કે રામલીલા મેદાનનો લગભગ 40 ટકા ભાગ ખાલી હતો. તેમણે દાવો કર્યો કે મેદાનમાં આશરે 28 હજાર ખુરશીઓ ગોઠવવામાં આવી હતી, જેમાંથી બપોરે 3:30થી 4 વાગ્યાની વચ્ચે 5,000થી 7,000 ખુરશીઓ ખાલી હતી.

‘તો રાહુલ ગાંધી પોતે જ ગેરકાયદે વિપક્ષના નેતા છે’

ભાજપના સાંસદ સંબિત પાત્રાએ કહ્યું કે રાહુલ ગાંધીએ 2024ની લોકસભા ચૂંટણીને ગેરકાયદે ગણાવી હતી. પાત્રાએ દલીલ કરી કે 2024ની ચૂંટણી સમયે જ્ઞાનેશ કુમાર ચૂંટણી કમિશનર નહોતા બન્યા, તેઓ 2025માં ચૂંટણી કમિશનર બન્યા હતા.

તેમણે કટાક્ષ કરતાં કહ્યું કે જો 2024ની ચૂંટણી ગેરકાયદે હતી તો રાહુલ ગાંધી પોતે પણ ગેરકાયદે વિપક્ષના નેતા છે અને તેમની પાર્ટીના તમામ સાંસદો પણ ગેરકાયદે છે.

‘વાંધો હતો તો કોર્ટમાં પડકાર આપવો જોઈતો હતો’

સંબિત પાત્રાએ સવાલ ઉઠાવ્યો કે જો કોઈ ચૂંટણી ગેરકાયદે હોય તો તેને કોર્ટમાં પડકારવી જોઈએ. તેમણે કહ્યું કે રાહુલ ગાંધી, કોંગ્રેસ કે INDIA ગઠબંધનના કોઈપણ પક્ષે 2024ની ચૂંટણીને પડકારતી એક પણ અરજી કરી હોય તો બતાવે.

પાત્રાએ વધુમાં કહ્યું કે અઢી વર્ષ બાદ રામલીલા મેદાનમાં ઊભા રહીને કોઈ ચૂંટણીને મનસ્વી રીતે ગેરકાયદે જાહેર કરી શકાય નહીં.

વધુ સમાચાર વાંચવા ડાઉનલોડ કરો સંદેશ ન્યૂઝ એપ : https://sandesh.com/d