પુણે સ્થિત સંરક્ષણ સંશોધન અને વિકાસ સંગઠન (DRDO) ના પૂર્વ ડિરેક્ટર ડૉ. પ્રદીપ કુરુલકર પર પાકિસ્તાની ગુપ્તચર એજન્સીઓને સંવેદનશીલ માહિતી પૂરી પાડવાનો ગંભીર આક્ષેપ છે. આ કેસમાં બોમ્બે હાઈકોર્ટે લાંબી દલીલો બાદ પોતાનો ચુકાદો અનામત રાખ્યો છે, જે હવે 7 એપ્રિલના રોજ જાહેર કરવામાં આવશે.
કેસની પૃષ્ઠભૂમિ અને ધરપકડ
ડૉ. પ્રદીપ કુરુલકર DRDO માં અત્યંત જવાબદાર પદ પર કાર્યરત હતા, જ્યાં તેઓ મહત્વપૂર્ણ મિસાઇલ અને એન્જિનિયરિંગ પ્રોજેક્ટ્સનું નેતૃત્વ કરતા હતા. ફેબ્રુઆરી 2023માં DRDO ના આંતરિક સુરક્ષા વિભાગને જાણવા મળ્યું કે કુરુલકર શંકાસ્પદ વિદેશી નંબરો સાથે સતત સંપર્કમાં છે. પ્રાથમિક તપાસ બાદ 24 ફેબ્રુઆરી 2023ના રોજ તેમના બે મોબાઈલ ફોન અને લેપટોપ જપ્ત કરવામાં આવ્યા હતા. મે 2023માં મહારાષ્ટ્ર એન્ટી-ટેરરિઝમ સ્ક્વોડ (ATS) દ્વારા સત્તાવાર રીતે તેમની ધરપકડ કરવામાં આવી હતી.
હનીટ્રેપ અને પાકિસ્તાની કનેક્શન
તપાસ એજન્સીના જણાવ્યા મુજબ કુરુલકરને પાકિસ્તાની એજન્ટો દ્વારા 'હનીટ્રેપ' માં ફસાવવામાં આવ્યા હતા. પ્રોસિક્યુશન મુજબ તેમને યુકેના એક નંબર પરથી સંપર્ક કરવામાં આવ્યો હતો, પરંતુ તે નંબર પાકિસ્તાનથી ઓપરેટ થઈ રહ્યો હતો. આરોપ છે કે કુરુલકરે વોટ્સએપ ચેટ, વોઈસ કોલ અને વિડિયો કોલ દ્વારા વિદેશી એજન્ટો સાથે સંવેદનશીલ દસ્તાવેજો શેર કર્યા હતા. એટલું જ નહીં, તેમણે એજન્ટો દ્વારા મોકલવામાં આવેલી શંકાસ્પદ APK ફાઇલો પણ પોતાના ડિવાઇસમાં ડાઉનલોડ કરી હતી.
કયા સંરક્ષણ પ્રોજેક્ટ્સ જોખમમાં મૂકાયા?
ફરિયાદ પક્ષે કોર્ટમાં રજૂઆત કરી હતી કે કુરુલકરે રાષ્ટ્રીય સુરક્ષાને લગતા અત્યંત ગુપ્ત પ્રોજેક્ટ્સની વિગતો લીક કરી છે. જેમાં મુખ્ય આ પ્રોજેક્ટ્સનો સમાવેશ થાય છે, મિસાઇલ સિસ્ટમ્સ: અગ્નિ-6, બ્રહ્મોસ અને સરફેસ-ટુ-એર મિસાઇલ્સ (SAMs), ડ્રોન ટેકનોલોજી: રુસ્તમ પ્રોજેક્ટ, યુસીએવી (UCAVs) અને ક્વાડ-કોપ્ટર ટેકનોલોજી અને વ્યૂહાત્મક માહિતી: રાફેલ ફાઈટર જેટના અમુક પાસાઓ અને ફિલિપાઇન્સમાં સંરક્ષણ નિકાસ સંબંધિત સંવેદનશીલ ડેટા.
બચાવ પક્ષની દલીલો
ડૉ. કુરુલકર વતી વરિષ્ઠ વકીલ અશોક મુંદરગીએ જામીન માટે દલીલ કરી હતી કે જે માહિતી શેર કરવાનો આરોપ છે તેમાંથી મોટાભાગની વિગતો પહેલેથી જ જાહેર ક્ષેત્ર (Public Domain) માં ઉપલબ્ધ છે. તેમણે એમ પણ કહ્યું હતું કે કુરુલકર નિવૃત્તિની નજીક હતા અને તેમને ખોટી રીતે આ કેસમાં ફસાવવામાં આવ્યા છે. બચાવ પક્ષે દાવો કર્યો હતો કે આરોપીએ કોઈ પણ પ્રકારની દેશદ્રોહી પ્રવૃત્તિ કે જાણીજોઈને ડેટા ચોરી કરી નથી.
7 એપ્રિલે અંતિમ ચુકાદો
જસ્ટિસ શિવકુમાર દિગેની બેન્ચે બંને પક્ષોની ધારદાર દલીલો સાંભળ્યા બાદ નોંધ્યું કે આ કેસ રાષ્ટ્રીય સુરક્ષા સાથે જોડાયેલો હોવાથી અત્યંત ગંભીર છે. કોર્ટે તમામ પુરાવાઓ અને ફોરેન્સિક રિપોર્ટ્સની તપાસ કર્યા બાદ પોતાનો આદેશ અનામત રાખ્યો છે. હવે સમગ્ર દેશની નજર 7 એપ્રિલના રોજ આવનારા હાઈકોર્ટના ચુકાદા પર છે.
વધુ સમાચાર વાંચવા માટે ક્લિક કરો
