રાહુલ ગાંધીએ ટાટાને ગુનાહિત રીતે બરબાદ કરવાનો આરોપ લગાવ્યો, નિર્મલા સીતારમણે લાઇસન્સ-કોટા રાજ અને ન્યાયતંત્રના અપમાનનો ઉલ્લેખ કરીને વળતો પ્રહાર કર્યો.
રાહુલ ગાંધીએ X પર શું લખ્યું?
ટાટા અંગે લોકસભામાં વિપક્ષના નેતા રાહુલ ગાંધીએ સોશિયલ મીડિયા પ્લેટફોર્મ X પર કરેલી પોસ્ટને લઈને રાજકીય ચર્ચા શરૂ થઈ છે. રાહુલના નિવેદન પર નાણામંત્રી નિર્મલા સીતારમણે આકરો જવાબ આપ્યો છે. તેમણે કહ્યું કે દરેક મુદ્દાનું રાજકીયકરણ કરવું યોગ્ય નથી. વ્યાપારી અને કાનૂની બાબતોને પુરાવા વિના ગુનાહિત ગણાવવી સ્વીકાર્ય નથી. તેમણે આ મુદ્દે કોંગ્રેસના જૂના લાઇસન્સ-કોટા રાજ અને ન્યાયતંત્ર અંગેના તેના વલણનો પણ ઉલ્લેખ કર્યો હતો.
'ટાટાને ગુનાહિત રીતે બરબાદ કરવામાં આવી રહ્યા છે'
રાહુલ ગાંધીએ પોતાની X પોસ્ટમાં આરોપ લગાવ્યો હતો કે ટાટાને ગુનાહિત રીતે બરબાદ કરવામાં આવી રહ્યા છે, પરંતુ કોઈ પણ ઉદ્યોગપતિ આ મુદ્દે બોલવાની હિંમત કરી રહ્યો નથી. તેમણે સવાલ કર્યો હતો કે ઉદ્યોગપતિઓ ક્યાં સુધી ચૂપ રહેશે? શું તેઓ ત્યાં સુધી રાહ જોશે, જ્યાં સુધી તેમના પર માલિકી હક જમાવવામાં ન આવે?
રાહુલ ગાંધીએ વધુમાં કહ્યું હતું કે ભારતીય ઉદ્યોગજગત વડાપ્રધાન નરેન્દ્ર મોદી અને ગૃહમંત્રી અમિત શાહનું રમકડું નથી. તેમણે ઉદ્યોગપતિઓની હિંમત પર સવાલ ઉઠાવતાં કહ્યું હતું કે તેમનામાં હિંમતની કમી છે, પરંતુ તેમનામાં હિંમત છે અને આ કથિત ગુનાઓ માટે ન્યાય સુનિશ્ચિત કરવામાં આવશે.
નિર્મલા સીતારમણે શું જવાબ આપ્યો?
રાહુલ ગાંધીના આ નિવેદનના જવાબમાં નાણામંત્રી નિર્મલા સીતારમણે તેમને લોકસભામાં વિપક્ષના નેતા તરીકેની જવાબદારી યાદ અપાવી હતી. તેમણે કહ્યું કે દરેક મુદ્દાને રાજકીય રંગ આપવાને બદલે તથ્યોના આધારે ચર્ચા થવી જોઈએ. તેમણે સવાલ કર્યો હતો કે શું રાહુલ ગાંધી ઉદ્યોગપતિઓને ઉશ્કેરીને તેમની વચ્ચે અવિશ્વાસ અને નફરત ફેલાવવા માગે છે?
સીતારમણે ભારપૂર્વક જણાવ્યું હતું કે વ્યાપારી અથવા કાનૂની બાબતોને યોગ્ય પુરાવા વિના ગુનાહિત ગણાવવી યોગ્ય નથી. તેમના મતે, આવા મુદ્દાઓ પર પાયાવિહોણા આક્ષેપો કરવાને બદલે રચનાત્મક ચર્ચા થવી જોઈએ.
https://x.com/nsitharaman/status/2115382369062703495?a=WLXsbNaKgpFqSvfkgRU&s=20
લાઇસન્સ-કોટા રાજને લઈને કોંગ્રેસ પર પ્રહાર
નિર્મલા સીતારમણે આરોપ લગાવ્યો હતો કે રાહુલ ગાંધી ભારતીય ઉદ્યોગો અને ઉદ્યોગપતિઓની સફળતાઓની વારંવાર ટીકા કરતા રહ્યા છે. તેમણે કહ્યું કે દાયકાઓ સુધી કોંગ્રેસે લાઇસન્સ-કોટા રાજ દ્વારા ઉદ્યોગસાહસિકતાને દબાવી રાખી હતી અને કરોડો ભારતીયોને ગરીબીમાં ધકેલી દીધા હતા.
તેનાથી વિપરીત, સીતારમણે દાવો કર્યો હતો કે વડાપ્રધાન નરેન્દ્ર મોદીના નેતૃત્વ હેઠળની સરકાર ઉદ્યોગોને રોજગારીનું સર્જન કરનારા અને આર્થિક વિકાસના મુખ્ય ચાલક તરીકે જુએ છે. તેમણે જણાવ્યું હતું કે સરકારની નીતિઓ વેપારને પ્રોત્સાહન આપવા, ઉદ્યોગોને મદદ કરવા અને દેશમાં રોકાણ વધારવાના હેતુથી બનાવવામાં આવી છે.
ઉદ્યોગો, ખેડૂતો અને યુવાનો માટે રચનાત્મક ચર્ચા જરૂરી
નાણામંત્રીએ કહ્યું હતું કે રાજકીય પક્ષો, નેતાઓ, સરકારો અને સંસ્થાઓની ઉદ્યોગોને સહકાર આપવાની, ખેડૂતોને મજબૂત બનાવવાની અને યુવાનોનું ભવિષ્ય સુરક્ષિત કરવાની સમાન જવાબદારી છે. તેથી ઉદ્યોગજગતને લગતા મુદ્દાઓ પર પાયાવિહોણા આરોપો લગાવવાને બદલે રચનાત્મક સંવાદ થવો જોઈએ.
તેમણે વધુમાં કહ્યું હતું કે બંધારણ દરેક નાગરિકને ન્યાયની ખાતરી આપે છે અને ન્યાય જાળવી રાખવામાં અદાલતોની મહત્વપૂર્ણ ભૂમિકા છે. સીતારમણે આરોપ લગાવ્યો હતો કે રાહુલ ગાંધી, તેમની પાર્ટી અને તેમની પાર્ટીના અગાઉના વડાપ્રધાનોએ ભૂતકાળમાં ન્યાયતંત્રનું અપમાન કર્યું છે.
'દરેક જગ્યાએ ભૂત જોવાનું બંધ કરો'
પોતાની પ્રતિક્રિયાના અંતમાં નિર્મલા સીતારમણે રાહુલ ગાંધીને ટકોર કરતાં કહ્યું હતું કે તેમણે દરેક જગ્યાએ ભૂત જોવાનું બંધ કરવું જોઈએ. ટાટા અંગે રાહુલ ગાંધીના આરોપો અને તેના જવાબમાં નાણામંત્રીની પ્રતિક્રિયાથી રાજકીય ચર્ચા વધુ તેજ બની છે. બંને નેતાઓનાં નિવેદનો ઉદ્યોગજગત, સરકારની નીતિઓ અને રાજકીય જવાબદારીને લઈને અલગ-અલગ અભિગમ દર્શાવે છે.
વધુ સમાચાર વાંચવા ડાઉનલોડ કરો સંદેશ ન્યૂઝ એપ : https://sandesh.com/d
