દિલ્હીને અડીને આવેલા ગાઝિયાબાદના ઇન્દિરાપુરમ પોલીસ સ્ટેશન વિસ્તારની વસુંધરા પોલીસ ચોકીમાં થયેલા શંકાસ્પદ વિસ્ફોટના મામલે મોટો અને ચોંકાવનારો વળાંક આવ્યો છે.

સોશિયલ મીડિયા પ્લેટફોર્મ X પર ‘ગાઝી 2’ (Ghazi 2) નામના એકાઉન્ટ પરથી પોસ્ટ કરીને આતંકી સંગઠન તહરીક-ઉલ-મુજાહિદ્દીને આ વિસ્ફોટની જવાબદારી સ્વીકારવાનો દાવો કર્યો છે. આ જ એકાઉન્ટ પરથી પોલીસ ચોકીને ઉડાવી દેવાની ધમકી આપતી પોસ્ટ પણ કરવામાં આવી હતી.

જોકે, ગાઝિયાબાદ પોલીસ અને સુરક્ષા એજન્સીઓ આ વાયરલ પોસ્ટની સત્યતા અને તેના સાયબર ટ્રેલની ઊંડાણપૂર્વક તપાસ કરી રહી છે.

X (ટ્વિટર) પર ‘ગાઝી 2’ નામના એકાઉન્ટ પરથી કરવામાં આવેલી પોસ્ટમાં દાવો કરવામાં આવ્યો છે કે વસુંધરા પોલીસ ચોકીને નિશાન બનાવવા પાછળ પ્રતિબંધિત સંગઠન તહરીક-ઉલ-મુજાહિદ્દીનનો હાથ છે. પોલીસ ચોકીની અંદર થયેલા વિસ્ફોટ બાદ આતંકી સંગઠનના નામે આ પ્રકારની પોસ્ટ સામે આવતાં જ ઉત્તર પ્રદેશ પોલીસ, સાયબર સેલ અને એન્ટી ટેરરિસ્ટ સ્ક્વોડ (ATS) એલર્ટ થઈ ગઈ છે. પોલીસ તપાસ કરી રહી છે કે આ પોસ્ટ કોઈ અસામાજિક તત્ત્વ દ્વારા ફેલાવવામાં આવેલી અફવા કે શરારત છે કે પછી તેની પાછળ કોઈ ઊંડું ષડયંત્ર છે.

રાત્રે 10 વાગ્યે ગૂંજ્યો હતો વિસ્ફોટ, બારી અને ACને નુકસાન, ડિલિવરી બોય ગંભીર રીતે ઘાયલ

પ્રત્યક્ષદર્શીઓના જણાવ્યા અનુસાર, રાત્રે લગભગ 10 વાગ્યે વસુંધરા પોલીસ ચોકીની અંદર અચાનક જોરદાર વિસ્ફોટ થયો હતો. તેનો અવાજ દૂર સુધી સંભળાયો હતો. વિસ્ફોટ એટલો પ્રચંડ હતો કે પોલીસ ચોકીના દરવાજા, બારીઓ અને ACને ભારે નુકસાન થયું હતું.

ઘટના સમયે પોલીસ ચોકીમાં એક સબ-ઇન્સ્પેક્ટર અને જમવાનું પહોંચાડવા આવેલા 20 વર્ષીય ડિલિવરી બોય વિશાલ હાજર હતા. કાચના તીક્ષ્ણ ટુકડા વાગતાં વિશાલ ગંભીર રીતે ઘાયલ થયો હતો. તેને તાત્કાલિક દિલ્હીના સૂર્યનગર વિસ્તારમાં આવેલી ખાનગી હોસ્પિટલમાં દાખલ કરવામાં આવ્યો હતો, જ્યાં તેની સારવાર ચાલી રહી છે.

ફોરેન્સિક તપાસ ચાલુ; CCTV ફૂટેજની તપાસ કરી રહ્યા છે ઉચ્ચ અધિકારીઓ

ઇન્દિરાપુરમના ACP સૂર્યબલી મૌર્યએ જણાવ્યું કે પોલીસ ચોકીની અંદર અચાનક વિસ્ફોટ થયો હતો. આ વિસ્ફોટ કોઈ ઉપકરણ, વિસ્ફોટક કે અન્ય કઈ સામગ્રીથી થયો હતો, તેનું ચોક્કસ કારણ ફોરેન્સિક અને ટેકનિકલ તપાસનો અહેવાલ આવ્યા બાદ જ સ્પષ્ટ થશે.

ફોરેન્સિક ટીમે ઘટનાસ્થળેથી વિસ્ફોટકના અવશેષો અને નમૂનાઓ એકત્ર કર્યા છે. આ ઉપરાંત, પોલીસ ચોકી અને આસપાસના વિસ્તારોમાં લગાવવામાં આવેલા તમામ CCTV કેમેરાનાં ફૂટેજની તપાસ કરવામાં આવી રહી છે, જેથી ઘટના પહેલાં કે પછી કોઈ શંકાસ્પદ હિલચાલ થઈ હોય તો તેની માહિતી મળી શકે.

વધુ સમાચાર વાંચવા ડાઉનલોડ કરો સંદેશ ન્યૂઝ એપ : https://sandesh.com/d