IIT બોમ્બેના વિદ્યાર્થી સાહિલ વાકોડેની આત્મહત્યાનો મામલો અત્યંત સંવેદનશીલ મુદ્દો બની ગયો છે. કેમ્પસમાં મોટા પાયે વિરોધ પ્રદર્શનોની સાથે સાથે, આ બાબતે તીવ્ર રાજકીય ચર્ચા પણ જગાવી છે. આ દરમિયાન, મહારાષ્ટ્ર નવનિર્માણ સેના (MNS)ના વડા રાજ ઠાકરેએ આ ઘટના પર ઊંડું દુઃખ વ્યક્ત કર્યું અને શિક્ષણ પ્રણાલીમાં વધતા શૈક્ષણિક દબાણ તથા જાતિગત રાજકારણની ટીકા કરી.
તપાસ વિના પ્રોફેસરોને દોષિત ઠેરવવા અયોગ્ય
ઠાકરેએ IIT વહીવટીતંત્રની ટીકા કરતા કહ્યું કે તેમણે યોગ્ય તપાસ કર્યા વિના જ વિદ્યાર્થી પર પરીક્ષા દરમિયાન મોબાઈલ ફોન અને ChatGPTનો ઉપયોગ કરવાનો આરોપ મૂક્યો હતો. તેમણે જણાવ્યું હતું કે પરીક્ષા દરમિયાન ગેરરીતિ અટકાવવી એ પ્રોફેસરોની ફરજ છે, પરંતુ તપાસ પહેલાં વિદ્યાર્થીને દોષિત જાહેર કરવો અયોગ્ય છે. તેવી જ રીતે, જાતિ આધારિત ઉત્પીડનના આરોપો ઉઠતાની સાથે જ, સંપૂર્ણ તપાસ વિના પ્રોફેસરોને દોષિત ઠેરવવા પણ એટલા જ અયોગ્ય છે.
https://twitter.com/ANI/status/2102656882632745226
રાજ ઠાકરેએ વ્યક્ત કરી ચિંતા
MNS વડાએ ચિંતા વ્યક્ત કરી કે મુખ્ય મુદ્દો એ હોવો જોઈતો હતો કે એક યુવાન વિદ્યાર્થીને પોતાનો જીવ આપવા માટે શા માટે મજબૂર થવું પડ્યું. તેના બદલે, સમગ્ર મામલાને જાતિના ચશ્માથી જોવામાં આવી રહ્યો છે. ઠાકરેએ ટિપ્પણી કરી હતી કે વર્ષ 2000થી મહારાષ્ટ્રમાં જાતિવાદ એટલી હદે વધી ગયો છે કે તે હવે IIT જેવી પ્રતિષ્ઠિત સંસ્થાઓમાં પણ વ્યાપી ગયો છે. એવી સંસ્થાઓ જેને પંડિત નેહરુએ "આધુનિક ભારતના મંદિરો" તરીકે વર્ણવી હતી.
https://twitter.com/RajThackeray/status/2102609551870890472
શિક્ષણ પ્રણાલીની ખામી-સુધારાની માંગ
તેમણે નોંધ્યું હતું કે પ્રવેશ પરીક્ષાઓમાં તીવ્ર સ્પર્ધા, ભારે શૈક્ષણિક બોજ અને કેમ્પસ પ્લેસમેન્ટના તણાવને કારણે, માત્ર IITમાં જ નહીં પરંતુ તમામ ક્ષેત્રોના યુવાનો હતાશા (ડિપ્રેશન)નો શિકાર બની રહ્યા છે. ઠાકરેએ વિદ્યાર્થીઓને શિક્ષણ પ્રણાલીની ખામીઓ સામે અવાજ ઉઠાવવા અને સુધારાની માંગ કરવા આહ્વાન કર્યું જેથી ભવિષ્યમાં આવી દુઃખદ ઘટનાઓ અટકાવી શકાય. 'શિક્ષણ પ્રણાલીમાં સુધારો એ જ સાચી શ્રદ્ધાંજલિ છે'
રાજ ઠાકરેએ IIT બોમ્બેના વિદ્યાર્થીઓની માંગણીઓનું સમર્થન કર્યું, જેમાં ચોવીસ કલાક મનોચિકિત્સકની ઉપલબ્ધતા, પારદર્શક ફરિયાદ નિવારણ પ્રણાલી અને સંવેદનશીલ શિસ્તબદ્ધ કાર્યવાહીનો સમાવેશ થાય છે. તેમણે જણાવ્યું હતું કે શિક્ષણ પ્રણાલીની ખામીઓને સુધારવી એ જ સાહિલને સાચી શ્રદ્ધાંજલિ હશે અને તેમણે પોતાની પાર્ટી વતી તેને હૃદયપૂર્વકની શ્રદ્ધાંજલિ આપી.
