IMC 2025: ભારત બન્યુ ડિઝિટલ ટેક્નોલોજીનું પાવરહાઉસ, PM Modiએ ઇન્ડિયન મોબાઇલ કોંગ્રેસનું કર્યું ઉદ્ઘાટન

ભારત અને એશિયાના સૌથી મોટા ટેકનોલોજી મેળા તરીકે ઓળખાતા ઈન્ડિયા મોબાઈલ કોંગ્રેસ (IMC) 2025નો આજથી પ્રારંભ થયો છે. IMC 2025 8 થી 11 ઓક્ટોબર દરમિયાન નવી દિલ્હીના યશોભૂમિ કન્વેન્શન સેન્ટર ખાતે યોજાઈ રહ્યું છે. પ્રધાનમંત્રી નરેન્દ્ર મોદીએ આજે ​​આ કાર્યક્રમનું ઉદ્ઘાટન કર્યું અને સભાને સંબોધિત કરી.

ભારત દરેક ક્ષેત્રમાં આગળ વધી રહ્યું છે- પીએમ મોદી 

પીએમ મોદીએ સંબોધન કરતા જણાવ્યું કે ભારત દરેક ક્ષેત્રમાં આગળ વધી રહ્યું છે. દરેક જગ્યાએ ફાઇવજી પહોંચી રહ્યું છે. સાથે એમ પણ કહ્યું કે દેશમાં એક લાખ ફોરજી ટાવર એક્ટિવ છે. પીએમ મોદીએ સાઇબર સિક્યુરિટી વધારવા પર ભાર મૂક્યો. તેમણે કહ્યું કે ઇન્ટરનેટ કનેક્ટિવિટી વધી રહી છે. પીએમ મોદીએ એમ પણ કહ્યું કે દેશની યુવા પેઢી ટેકનોલોજી ક્રાંતિમાં મહત્વપૂર્ણ યોગદાન આપી રહી છે. તેમણે કહ્યું કે પહેલાં ભવિષ્યનો અર્થ આગામી સદી અથવા આગામી 10-20 વર્ષ હતો, પરંતુ ટેકનોલોજી એટલી ઝડપથી બદલાઈ રહી છે કે હવે આપણે કહીએ છીએ કે the future is here now.

મોદીએ કહ્યું મેં પ્રદર્શનમાં કેટલાક સ્ટોલની મુલાકાત લીધી, જેનાથી મને ભવિષ્યની ઝલક મળી. આવનારો સમય ટેકનોલોજી ક્ષેત્રોમાં સંપૂર્ણપણે અલગ થવાનો છે, જેમાં ટેલિકોમ કનેક્ટિવિટી, 6G ટેકનોલોજી, AI, સાયબર સુરક્ષા, સેમિકન્ડક્ટર, ડ્રોન-સ્પેસ ટેકનોલોજી, ઊંડા સમુદ્ર અને ગ્રીન-ટેકનો સમાવેશ થાય છે. 

ભારત 6G ટેકનોલોજીમાં વિશ્વનું નેતૃત્વ કરશે- પીએમ મોદી 

પીએમ મોદીએ કહ્યું કે તેમને વિશ્વાસ છે કે ભારત 6G ટેકનોલોજીમાં વિશ્વનું નેતૃત્વ કરશે. ઇન્ટરનેટ સ્પીડના મહત્વ પર પ્રકાશ પાડતા મોદીએ કહ્યું કે ઇન્ટરનેટ સ્પીડ ફક્ત સંખ્યાઓ અને રેન્કિંગ વિશે નથી; સારી ઇન્ટરનેટ સ્પીડ જીવનની સરળતામાં પણ સુધારો કરે છે. તેમણે કહ્યું, "વધતી ઇન્ટરનેટ સ્પીડ કનેક્ટિવિટીને સરળ બનાવે છે. ટેકનોલોજીએ સામાન્ય નાગરિકોને એવા અધિકારો મેળવવામાં મદદ કરી છે જે પહેલા મેળવવા મુશ્કેલ હતા, અને ટેલિકોમ ક્ષેત્રે આમાં મુખ્ય ભૂમિકા ભજવી છે. 

દરેક જિલ્લામાં 5G છે- પીએમ મોદી 

પીએમ મોદીએ કહ્યું કે જ્યારે મેં મેક ઇન ઇન્ડિયા વિશે વાત કરી, ત્યારે કેટલાક લોકોએ તેનો મજાક ઉડાવી. શંકા અને સંદેહમાં જીવતા લોકો આશ્ચર્ય પામ્યા કે ભારત ટેકનોલોજીકલ રીતે અદ્યતન ઉપકરણો કેવી રીતે વિકસાવી શકે છે. આનું કારણ એ હતું કે, તેમના સમયમાં, નવી ટેકનોલોજી ભારતમાં પહોંચવામાં દાયકાઓ લાગ્યા હતા. એક દેશ જે એક સમયે 2G સાથે સંઘર્ષ કરતો હતો આજે તે દેશના લગભગ  દરેક જિલ્લામાં 5G છે.

કેબલ ઇન્ટરનેટ 200,000 ગ્રામ પંચાયતો સુધી પહોંચે 

સભાને સંબોધતા, પીએમ મોદીએ કહ્યું કે ભારત નેટ પ્રોજેક્ટે 200,000 ગ્રામ પંચાયતોને બ્રોડબેન્ડ ઇન્ટરનેટથી જોડ્યા છે. મોદીએ કહ્યું કે અટલ ટિંકરિંગ લેબ્સ (ATL) મિશન દ્વારા 10,000 લેબ દ્વારા 7.5 મિલિયન બાળકોને અત્યાધુનિક ટેકનોલોજી સાથે જોડવામાં આવ્યા છે. પીએમએ વધુમાં જણાવ્યું હતું કે આજે ટેકનિકલ સંસ્થાઓમાં 100 યુઝ-કેસ લેબ્સનું લોન્ચિંગ આ વૃદ્ધિને વેગ આપશે.

એશિયાનો સૌથી મોટો ટેક અને ટેલિકોમ ઇવેન્ટ

ઇન્ડિયા મોબાઇલ કોંગ્રેસ એશિયાનો સૌથી મોટો ટેલિકોમ, મીડિયા અને ટેકનોલોજી ઇવેન્ટ છે. આ વર્ષે, વિશ્વભરના ઉદ્યોગ નિષ્ણાતો, નીતિ નિર્માતાઓ અને ટેક ઇનોવેટર્સ ભાગ લેશે. ચાર દિવસીય ઇવેન્ટમાં ઓપ્ટિકલ કોમ્યુનિકેશન્સ, સેમિકન્ડક્ટર્સ, ક્વોન્ટમ કોમ્યુનિકેશન્સ, 6G અને છેતરપિંડી જોખમ સૂચકાંકો જેવા મુખ્ય વિષયો પર પ્રદર્શનો અને ચર્ચાઓ યોજાશે.

IMC 2025 માં 150 થી વધુ દેશોના 150,000 થી વધુ મુલાકાતીઓ અને 400 થી વધુ કંપનીઓ ભાગ લઈ રહી છે. આ ઇવેન્ટમાં 800 થી વધુ વક્તાઓ અને 100 થી વધુ સત્રો ભાગ લેશે, જેમાં જાપાન, કેનેડા, બ્રિટન, રશિયા, આયર્લેન્ડ અને ઑસ્ટ્રિયા જેવા દેશોના પ્રતિનિધિમંડળોનો સમાવેશ થાય છે. આ ઇવેન્ટને આંતરરાષ્ટ્રીય સહયોગ તરફ એક મોટું પગલું માનવામાં આવે છે.