ઉત્તર પાકિસ્તાન અને જમ્મુ-કાશ્મીર પર સક્રિય થયેલા વેસ્ટર્ન ડિસ્ટર્બન્સ (પશ્ચિમી વિક્ષેપ)ના કારણે પંજાબ, હરિયાણા અને ચંદીગઢમાં હવામાનનો મિજાજ ઝડપથી બદલાઈ રહ્યો છે. ભારતીય હવામાન વિભાગ (IMD) એ આ પ્રદેશોમાં ભારે વાવાઝોડા, તેજ વરસાદ અને કરા પડવાની શક્યતાને ધ્યાનમાં રાખીને ગુરુવાર, 15 ઓક્ટોબર માટે ઓરેન્જ એલર્ટ જ્યારે શુક્રવાર માટે યલો એલર્ટ જારી કર્યું છે.
ઝડપી પવન અને વરસાદની આગાહી
હવામાન વિભાગના જણાવ્યા અનુસાર, પંજાબ અને તેના આસપાસના વિસ્તારોમાં ગુરુવાર અને શુક્રવાર દરમિયાન 40 થી 50 કિલોમીટર પ્રતિ કલાકની ઝડપે પવન ફૂંકાઈ શકે છે, જે અમુક સમયે વધીને 60 કિલોમીટર પ્રતિ કલાકની ઝડપ પકડી શકે છે. આ દરમિયાન હળવાથી મધ્યમ વરસાદ સાથે ગાજવીજ, વીજળીના ચમકારા અને કેટલાક સ્થળોએ કરા પડવાની પ્રબળ શક્યતા વ્યક્ત કરવામાં આવી છે.