મુખ્ય ચૂંટણી કમિશનર (CEC) જ્ઞાનેશ કુમાર સામે વિપક્ષી પક્ષોના ઇન્ડિયા ગઠબંધન દ્વારા દિલ્હીના બારાખંભાથી સુપ્રીમ કોર્ટ સુધી કૂચ કરવામાં આવી રહી છે. જેમાં વરિષ્ઠ વકીલ અને કોંગ્રેસના રાજ્યસભા સાંસદ અભિષેક મનુ સિંઘવી પણ જોડાયા છે.
આ દરમિયાન તેમણે કહ્યું કે તમામ પક્ષો સુપ્રીમ કોર્ટમાં અરજી દાખલ કરશે. સિંઘવીએ કહ્યું, “અમે લોકશાહી માટે સિદ્ધાંતના મુદ્દા પર જઈ રહ્યા છીએ.”
સૂત્રોના જણાવ્યા અનુસાર, કોંગ્રેસના નેતા રાહુલ ગાંધી પોતાના કેટલાક નેતાઓ અને વકીલો સાથે સુપ્રીમ કોર્ટ પરિસરમાં આવેલા અરજી દાખલ કરવાના કાઉન્ટર પર અરજી જમા કરાવવા જઈ શકે છે. કૂચ પહેલાં રાહુલ ગાંધીએ પત્રકાર પરિષદમાં કહ્યું હતું કે આજે ઇન્ડિયા ગઠબંધનના નેતાઓ અને તેઓ પોતે સુપ્રીમ કોર્ટ જશે અને સાથે મળીને અરજી દાખલ કરશે.
કોંગ્રેસના ઇન્દિરા ભવન સ્થિત મુખ્યાલયમાં પત્રકાર પરિષદને સંબોધતાં રાહુલ ગાંધીએ કહ્યું હતું કે CECએ રાજીનામું આપીને સરકારી સાક્ષી બનવું જોઈએ. તેમણે આરોપ લગાવ્યો કે CECએ ભૂલ કરી છે, પરંતુ આ ભૂલ પાછળ તેમનું પોતાનું મગજ નહોતું. વિપક્ષની લડાઈ તેમની પાછળ રહેલી મોટી શક્તિઓ સામે છે.
કોંગ્રેસના નેતા રાહુલ ગાંધીએ ઇન્ડિયા ગઠબંધનના નેતાઓ સાથે મુખ્ય ન્યાયાધીશ (CJI) સૂર્યકાંતને મળવા માટે પત્ર લખ્યો હતો. જોકે, CJIએ આ પ્રસ્તાવ નકારી કાઢ્યો હતો. તેમણે કહ્યું કે સુપ્રીમ કોર્ટમાં સુનાવણી માટે તેઓ તૈયાર છે. મામલો અદાલતમાં હોવાથી આ તબક્કે બેઠક યોજવી યોગ્ય નથી.
સમાચાર એજન્સી PTIએ સૂત્રોને ટાંકીને જણાવ્યું હતું કે CJIએ રાહુલ ગાંધીને ન્યાયિક પ્રક્રિયા હેઠળ અરજી દાખલ કરવા કહ્યું છે. આ અરજી પર મંગળવારે સુનાવણી થઈ શકે છે.
વિપક્ષના નેતા સાથેની મુલાકાત અંગે CJIએ કહ્યું કે સુપ્રીમ કોર્ટના દરવાજા દરેક માટે ખુલ્લા છે. તેમણે જણાવ્યું કે કોઈ પણ પ્રતિનિધિ હોય કે સામાન્ય નાગરિક, અદાલત તેમના અધિકારોનું રક્ષણ કરશે.