ભાગેડુ ઉદ્યોગપતિ મેહુલ ચોક્સી અંગે ભારતે એક મહત્વપૂર્ણ પગલું ભર્યું છે. ભારત સરકારે મુંબઈની આર્થર રોડ જેલના બેરેક નંબર 12 ના ફોટોગ્રાફ્સ બેલ્જિયમના અધિકારીઓને સોંપ્યા છે. એવું માનવામાં આવે છે કે ચોક્સીને તેના પ્રત્યાર્પણ પછી ત્યાં રાખવામાં આવશે.
બે સેલ, ખાનગી શૌચાલય અને મૂળભૂત સુવિધાઓ
મીડિયાના અહેવાલો પ્રમાણે આ બેરેક 46 ચોરસ મીટરને આવરી લે છે. તેમાં બે સેલ, ખાનગી શૌચાલય અને મૂળભૂત સુવિધાઓ છે. ભારતે ચોક્સીના દાવાને રદિયો આપવા માટે આ ફોટોગ્રાફ્સ પૂરા પાડ્યા છે કે ભારતીય જેલો ભીડભાડ, અસુરક્ષિત અને માનવાધિકાર ઉલ્લંઘનને પાત્ર છે.
આર્થર રોડ જેલના બેરેક નંબર 12 માં રાખવામાં આવશે
અહેવાલો પ્રમાણે ચોક્સીને મુંબઈની આર્થર રોડ જેલના બેરેક નંબર 12 માં રાખવામાં આવશે. આ એ જ ઉચ્ચ સુરક્ષાવાળી જેલ છે જ્યાં 26/11 ના આતંકવાદી અજમલ કસાબને એક સમયે રાખવામાં આવ્યો હતો.
ફક્ત તબીબી કારણોસર અથવા કોર્ટમાં હાજરી આપવા માટે જેલમાંથી બહાર લાવવામાં આવશે
અહેવાલો મુજબ મેહુલ ચોક્સીની બેરેકમાં બે રૂમ અને એક એટેચ્ડ શૌચાલય છે. ચોક્સીને ફક્ત તબીબી કારણોસર અથવા કોર્ટમાં હાજરી આપવા માટે જેલમાંથી બહાર લાવવામાં આવશે તથા તેની દેખરેખ કોર્ટ દ્વારા કરવામાં આવશે, તપાસ એજન્સી દ્વારા નહીં. ભારતે કોર્ટને ખાતરી આપી છે કે જેલમાં તમામ માનવાધિકાર ધોરણો અને તબીબી સુવિધાઓ ઉપલબ્ધ છે.
ભારતીય જેલો ખરાબ હાલતમાં છે
ચોકસીની કાનૂની ટીમે બેલ્જિયમની કોર્ટમાં દલીલ કરી હતી કે ભારતીય જેલો ખરાબ હાલતમાં છે અને ન્યાયતંત્ર સ્વતંત્ર રીતે કાર્ય કરતું નથી. જો કે, કોર્ટે આ દાવાઓને ફગાવી દેતા કહ્યું હતું કે, "ચોકસીએ રજૂ કરેલા અહેવાલો શીખ કાર્યકર્તાવાદ અથવા તિહાર જેલ જેવા અસંબંધિત બાબતો સાથે સંબંધિત છે અને તે સાબિત કરતા નથી કે તેમને ભારતમાં કોઈ અન્યાય કે સતાવણીનો સામનો કરવો પડશે."
મોટા નાણાકીય કૌભાંડોનું મીડિયા કવરેજ સામાન્ય
કોર્ટે વધુમાં જણાવ્યું હતું કે મોટા નાણાકીય કૌભાંડોનું મીડિયા કવરેજ સામાન્ય છે અને તે ન્યાયિક પક્ષપાતના પુરાવા પૂરા પાડતું નથી. વધુમાં, ચોકસીએ એવો કોઈ પુરાવો આપવામાં નિષ્ફળ રહ્યો કે તેને ભારતમાં તબીબી સારવાર મળશે નહીં અથવા અમાનવીય વર્તનનો ભોગ બનવું પડશે.
આર્થર રોડ જેલ આંતરરાષ્ટ્રીય ધોરણોનું પાલન કરે છે
ભારત સરકારે તેના અહેવાલમાં જણાવ્યું હતું કે, "મેહુલ ચોકસીને બેરેક નંબર 12 માં રાખવામાં આવશે અને તેને ફક્ત તબીબી સારવાર અથવા કોર્ટમાં હાજરી આપવા માટે બહાર લઈ જવામાં આવશે. તે ભારતીય અદાલતોના અધિકારક્ષેત્રમાં રહેશે, તપાસ એજન્સીના નહીં." ભારતે એમ પણ કહ્યું હતું કે આર્થર રોડ જેલ આંતરરાષ્ટ્રીય ધોરણોનું પાલન કરે છે અને ત્યાંના કેદીઓને તમામ જરૂરી સુવિધાઓ પૂરી પાડે છે.
પ્રત્યાર્પણ પ્રક્રિયાને નવી ગતિ મળી
બેલ્જિયમની કોર્ટના આદેશથી ચોક્સીના પ્રત્યાર્પણ પ્રક્રિયા આગળ વધવાનો માર્ગ મોકળો થયો છે. કોર્ટે ચોક્સીના રાજકીય ઉત્પીડન અને માનવાધિકાર ઉલ્લંઘનના આરોપોને ફગાવી દીધા અને કહ્યું કે તેના ભારત પાછા ફરવામાં કોઈ કાનૂની અવરોધો નથી.
