તેમણે નિવૃત્ત શત્રુજીત કપૂરનું સ્થાન લીધું છે. સંજય સિંઘલે BSF અને SSBમાં પણ સેવા આપી હતી.
ચાર્જ સંભાળ્યા બાદ સિંઘલે સલામી લીધી
1993 બેચના ભારતીય પોલીસ સેવા અને ઉત્તર પ્રદેશ કેડરના વરિષ્ઠ અધિકારી સંજય સિંઘલે રવિવારે ભારત-તિબેટીયન બોર્ડર પોલીસ ફોર્સના ડાયરેક્ટર જનરલનો વધારાનો હવાલો સંભાળ્યો છે. જેમનો આદેશ ભારત સરકાર દ્વારા આપવામાં આવ્યો હતો. નવી દિલ્હીમાં ફોર્સ હેડક્વાર્ટર ખાતે ચાર્જ સંભાળ્યા બાદ સિંઘલે સલામી લીધી અને ગાર્ડ ઓફ ઓનરનું નિરીક્ષણ કર્યું હતુ. આ પ્રસંગે સંજય ગુંજ્યાલ, IPS, એડિશનલ ડાયરેક્ટર જનરલ અને ફોર્સના અન્ય વરિષ્ઠ અધિકારીઓ હાજર રહ્યા હતા.
યુપી પોલીસથી લઈને આઈટીબીપીના ડાયરેક્ટર જનરલ
તેમના કાર્યકાળ દરમિયાન, તેમણે ઉત્તર પ્રદેશ પોલીસમાં વિવિધ મહત્વપૂર્ણ હોદ્દાઓ સંભાળ્યા છે. તેમણે મે 2002થી જૂન 2003 સુધી કોસોવોમાં સંયુક્ત રાષ્ટ્ર શાંતિ રક્ષા મિશન હેઠળ પણ સેવા આપી હતી. અગાઉ, સિંઘલે દેહરાદૂન ખાતે સેક્ટર હેડક્વાર્ટરમાં ડેપ્યુટી ઇન્સ્પેક્ટર જનરલ અને આઈટીબીપીમાં ઇસ્ટર્ન ફ્રન્ટિયરના ઇન્સ્પેક્ટર જનરલ તરીકે સેવા આપી હતી. આ સમયગાળા દરમિયાન, તેમણે સરહદ સુરક્ષા, ગુપ્તચર અને ઓપરેશનલ મેનેજમેન્ટ સંબંધિત મહત્વપૂર્ણ જવાબદારીઓ નિભાવી હતી. ત્યારબાદ તેમણે બોર્ડર સિક્યુરિટી ફોર્સના સ્પેશિયલ ડાયરેક્ટર જનરલ તરીકે સેવા આપી હતી. હાલમાં તેઓ સશસ્ત્ર સીમા બલના ડાયરેક્ટર જનરલનું પદ ધરાવે છે.
ત્રણ દાયકાના અનુભવ
ઉત્કૃષ્ટ અને વિશિષ્ટ સેવા માટે, સિંઘલને વિશિષ્ટ સેવા માટે રાષ્ટ્રપતિ પોલીસ મેડલ, મેરીટોરીયસ સર્વિસ માટે પોલીસ મેડલ, મુશ્કેલ સેવા મેડલ અને કોસોવોમાં સંયુક્ત રાષ્ટ્ર શાંતિ રક્ષા મિશનમાં તેમના યોગદાન બદલ સંયુક્ત રાષ્ટ્ર મેડલથી સન્માનિત કરવામાં આવ્યા છે. રાજ્ય પોલીસ, આંતરરાષ્ટ્રીય શાંતિ રક્ષા મિશન અને કેન્દ્રીય સશસ્ત્ર પોલીસ દળોમાં વ્યાપક અનુભવ ધરાવતા સિંઘલના નેતૃત્વ હેઠળ, ITBP ની કાર્યકારી ક્ષમતાઓ, આધુનિકીકરણ અને સંસ્થાકીય મજબૂતીકરણને નવી ગતિ મળવાની અપેક્ષા છે.
આ પણ વાંચોઃ પગાર વધારાની માંગ સાથે રસ્તા પર ઊતર્યા હજારો ગારમેન્ટ વર્કર્સ, ઢાકા-ગાઝીપુરમાં તોડફોડ અને આગચંપી