જમ્મુ કાશ્મીરના ઉધમપુરમાં યાત્રિકો ભરેલી બસ ખીણમાં ખાબકતા 2 લોકોના મોત થયા છે. જ્યારે 14થી વધારે લોકો ઇજાગ્રસ્ત થયા છે.
અધિકારીઓએ જણાવ્યુ કે બસ પેચૌંડથી રામનગર જઇ રહી હતી ત્યારે આ ઘટના બની. અધિકારીઓએ જણાવ્યું કે 6 યાત્રિકોની સ્થિતિ ગંભીર છે. તેઓને વધુ સારવાર માટે વસંતગઢ પ્રાથમિક સ્વાસ્થ્ય કેન્દ્રથી ઉધમપુર જિલ્લા હોસ્પિટલ લઇ જવાયા છે.
https://x.com/ANI/status/2112772412383334884?ref_src=twsrc%5Etfw%7Ctwcamp%5Etweetembed%7Ctwterm%5E2112772412383334884%7Ctwgr%5E%7Ctwcon%5Es1_c10&ref_url=
અહેવાલો અનુસાર, બસના ડ્રાઈવરે વાહન પરનો કાબૂ ગુમાવી દીધો હતો, જેના કારણે મુસાફરોથી ભરેલી બસ ખીણમાં ખાબકી હતી. અકસ્માત બાદ, તમામ ઘાયલોને સારવાર માટે તાત્કાલિક હોસ્પિટલ લઈ જવામાં આવ્યા હતા.
ઉધમપુરના ડેપ્યુટી કમિશનર અનંત દ્વિવેદીએ જણાવ્યું હતું કે, આ અકસ્માત ઉધમપુર જિલ્લાના ગાલા પચૌંડ નજીક થયો હતો. તેમણે કહ્યું કે, બચાવ ટીમોને તાત્કાલિક ઘટનાસ્થળે રવાના કરવામાં આવી હતી. ઈમરજન્સી રિસ્પોન્સ ટીમો, સબ-ડિવિઝનલ મેજિસ્ટ્રેટ (SDM) અને તબીબી કર્મચારીઓ ઘટનાસ્થળે પહોંચી ગયા છે.
તેમણે વધુમાં જણાવ્યું કે, "તબીબી ટીમો ઘટનાસ્થળ તરફ જઈ રહી છે. રામનગરની સબ-ડિસ્ટ્રિક્ટ હોસ્પિટલના સ્ટાફને એલર્ટ કરી દેવામાં આવ્યો છે અને ત્યાં ઘાયલોની સારવાર માટે સંપૂર્ણ તૈયારીઓ કરી લેવામાં આવી છે. વહીવટી અધિકારીઓ ઘટનાસ્થળે સક્રિયપણે કામ કરી રહ્યા છે.
મનોજ સિંહાએ દુઃખ વ્યક્ત કર્યું
જમ્મુ અને કાશ્મીરના લેફ્ટનન્ટ ગવર્નર મનોજ સિન્હાએ આ અકસ્માતમાં બે લોકોના મૃત્યુ પર શોક વ્યક્ત કર્યો છે. તેમણે ઘાયલોના ઝડપી સ્વસ્થ થવાની કામના કરી છે અને જિલ્લા વહીવટીતંત્રને સૂચના આપી છે કે તેઓ ઘાયલોને યોગ્ય તબીબી સારવાર મળે તે સુનિશ્ચિત કરે.
આ અકસ્માતમાં બસ સંપૂર્ણપણે કચડાઈ ગઈ હતી અને ધાતુના એક ક્ષતિગ્રસ્ત ઢગલામાં ફેરવાઈ ગઈ હતી. અધિકારીઓએ જણાવ્યું હતું કે ઘટના બન્યાના તરત જ સ્થાનિક ગ્રામજનોએ બચાવ કામગીરી શરૂ કરી દીધી હતી અને ઘાયલ મુસાફરોને હોસ્પિટલ પહોંચાડ્યા હતા.
અકસ્માત વિશે જાણ થતાં, કેન્દ્રીય મંત્રી જિતેન્દ્ર સિંહે ઉધમપુરના ડેપ્યુટી કમિશનર અનંત દ્વિવેદી સાથે વાત કરી હતી. તેમણે જણાવ્યું કે ઘાયલોને તમામ શક્ય મદદ પૂરી પાડવામાં આવી રહી છે.
આ પણ વાંચો: Sanwaliya Seth: 23 કરોડ રોકડ, 92 કિલો સોનું ચાંદી અને..સાંવરિયા શેઠ મંદિરનો ખૂલ્યો ભંડાર