જમ્મુ-કાશ્મીરના પૂરગ્રસ્ત વિસ્તારો નૌશેરા અને પુછમાં ભારે વરસાદ બાદ સ્થિતિ ગંભીર બની છે. પુછ વિસ્તારમાં ભૂસ્ખલન અને પૂરના કારણે 7 લોકોના મોત થયા છે. આ દરમિયાન ભારતીય સેના અને જમ્મુ-કાશ્મીર પોલીસે સંયુક્ત રીતે હેલિકોપ્ટરની મદદથી વિશેષ રેસ્ક્યૂ ઓપરેશન હાથ ધરીને પૂર દરમિયાન મૃત્યુ પામેલા એક નાગરિકનો મૃતદેહ બહાર કાઢ્યો હતો.
સતત ભારે વરસાદને કારણે નદી-નાળાઓમાં પાણીનું સ્તર અચાનક વધી ગયું હતું, જેના કારણે મૃતદેહ સુધી પહોંચવું મુશ્કેલ બન્યું હતું. તેજ પ્રવાહ અને ખરાબ હવામાનને કારણે NDRFની ટીમો પણ અગાઉ સફળ થઈ શકી ન હતી. ત્યારબાદ સેના અને પોલીસે હેલિકોપ્ટર દ્વારા રેસ્ક્યૂ ટીમને ઘટનાસ્થળે પહોંચાડી અને મુશ્કેલ પરિસ્થિતિ વચ્ચે મૃતદેહને સુરક્ષિત બહાર કાઢ્યો હતો.
હાલ અસરગ્રસ્ત વિસ્તારોમાં રાહત અને બચાવ કામગીરી સતત ચાલુ છે. સેના, પોલીસ, NDRF અને SDRFની ટીમો ફસાયેલા લોકોને સુરક્ષિત બહાર કાઢવા તેમજ ગુમ થયેલા લોકોની શોધખોળમાં લાગી છે. પ્રશાસને લોકોને નદી-નાળા અને ભૂસ્ખલનની સંભાવના ધરાવતા વિસ્તારોમાં ન જવા તેમજ હવામાન વિભાગની સૂચનાઓનું પાલન કરવાની અપીલ કરી છે.
આ દરમિયાન સિંચાઈ અને પૂર નિયંત્રણ વિભાગે દક્ષિણ કાશ્મીર માટે એલર્ટ જાહેર કર્યું છે. હવામાન વિભાગના અનુમાન મુજબ અનંતનાગ, કુલગામ અને શોપિયાં જિલ્લામાં ભારે વરસાદની શક્યતા છે. વિભાગે પૂરની સંભાવનાને ધ્યાનમાં રાખીને નદી, નાળા અને અન્ય જળમાર્ગોમાં પાણીનું સ્તર ઝડપથી વધી શકે તેવી ચેતવણી આપી છે.
આ પણ વાંચો : દિલ્હી-NCRથી લઈને બિહાર-બંગાળમાં ભારે વરસાદની આગાહી, UP-હિમાચલમાં રેડ એલર્ટ