કર્ણાટકમાં મુસાફરી મોંઘી થઈ ગઈ છે. રાજ્યમાં બસ ભાડામાં વધારો કરવામાં આવ્યો છે. કર્ણાટકના પરિવહન મંત્રી બાયરાથી સુરેશે ચારેય રાજ્ય સંચાલિત પરિવહન નિગમોના ભાડામાં વધારો કરવાની જાહેરાત કરી છે. મંત્રીના જણાવ્યા અનુસાર, કર્ણાટક રાજ્ય માર્ગ પરિવહન નિગમ (KSRTC) ના ભાડામાં મહત્તમ ₹9 નો વધારો કરવામાં આવ્યો છે, જ્યારે બેંગલુરુ મેટ્રોપોલિટન ટ્રાન્સપોર્ટ કોર્પોરેશન (BMTC) ની શહેર બસોના ભાડામાં મહત્તમ ₹10 નો વધારો કરવામાં આવ્યો છે. સુધારેલા ભાડા બુધવારની મધ્યરાત્રિથી અમલમાં આવશે.
BMTC બસ ભાડામાં ₹10 નો વધારો
મળતી માહિતી અનુસાર, મંત્રી સુરેશે જણાવ્યું હતું કે બેંગલુરુમાં BMTC બસોનું લઘુત્તમ ભાડું ₹6 થી વધારીને ₹10 અને મહત્તમ ભાડું ₹35 થી વધારીને ₹45 કરવામાં આવ્યું છે. AC બસોનું મહત્તમ ભાડું ₹75 થી વધારીને ₹90 કરવામાં આવ્યું છે. વધુમાં, કેમ્પેગૌડા આંતરરાષ્ટ્રીય એરપોર્ટ માટે AC બસોનું ભાડું ₹405 થી વધારીને મહત્તમ ₹425 કરવામાં આવ્યું છે.
KSRTC બસ ભાડામાં ₹9નો વધારો થયો
મંત્રીએ મીડિયાને જણાવ્યું કે તમિલનાડુ અને મહારાષ્ટ્ર સરકારે પણ બસ ભાડામાં વધારો કર્યો છે. તેથી અમે પણ તેમાં વધારો કરી રહ્યા છીએ. તેમણે આ વધારા માટે ડીઝલના ભાવમાં વધારો જવાબદાર ગણાવ્યો. તેમના મતે, KSRTC બસ ભાડામાં મહત્તમ ₹9નો વધારો કરવામાં આવ્યો છે, અને રાજહંસ અને એસી બસ જેવી પ્રીમિયમ સેવાઓના ભાડા સ્પર્ધાત્મક બજાર દરોને ધ્યાનમાં રાખીને નક્કી કરવામાં આવ્યા છે. રાજ્ય સરકાર પહેલાથી જ "શક્તિ" યોજના હેઠળ રાજ્યમાં ગમે ત્યાં સામાન્ય સરકારી બસોમાં મહિલાઓને મફત મુસાફરીની સુવિધા આપે છે.
આ પણ વાંચો: Congress: રેલીમાં ન આવ્યા તો સસ્પેન્ડ! યુવા કોંગ્રેસની 3 રાજ્યમાં 83 પદાધિકારીઓ પર લાલઆંખ
