કેરળનાં પ્રથમ મહિલા IPS અધિકારી, જે રાજ્યમાં DGPના હોદ્દા સુધી પહોંચનારાં પ્રથમ મહિલા પણ છે, રાષ્ટ્રપતિ પોલીસ ચંદ્રકથી સન્માનિત, વિજિલન્સથી લઈને ફાયર એન્ડ રેસ્ક્યૂ સર્વિસ જેવી મહત્ત્વની જવાબદારીઓ સંભાળનારાં, તેઓ બ્રિટન સરકારની પ્રતિષ્ઠિત Chevening Fellowship માટે પસંદ થયેલાં છે અને પોલીસનો ગણવેશ ઉતાર્યા બાદ રાજકારણમાં પ્રવેશ કર્યા બાદ હવે તિરુવનંતપુરમ મહાનગરપાલિકામાં કાઉન્સિલર છે.

આ પરિચય છે પૂર્વ IPS અધિકારી આર. શ્રીલેખાનો, કે જેઓ હાલમાં પોતાના એક નિવેદન અને કાઉન્સિલર પદ પરથી રાજીનામું આપવાના પ્રયાસને લઈને ચર્ચામાં છે.

3 દાયકાથી વધુ સમય સુધી પોલીસ સેવામાં ઊંચા હોદ્દા પર રહ્યા બાદ શ્રીલેખા માટે વોર્ડ કાઉન્સિલરની જવાબદારી નિભાવવી સરળ સાબિત થઈ રહી નથી. પોતાની સ્થિતિ સમજાવવા માટે તેમણે પોલીસ વિભાગનું જ ઉદાહરણ આપ્યું. તેમણે કહ્યું કે જો કોઈ DGPને અચાનક 5 વર્ષ સુધી કોન્સ્ટેબલનું કામ કરવાનું કહેવામાં આવે, તો તેને અનેક મુશ્કેલીઓનો સામનો કરવો પડે. તેમના મતે, વોર્ડ કાઉન્સિલર તરીકે કામ કરતી વખતે તેઓ પણ આવી જ મુશ્કેલીઓ સાથે તાલમેલ બેસાડવાનો પ્રયાસ કરી રહ્યાં હતાં. શ્રીલેખાએ સ્પષ્ટ કર્યું કે માનસિક દબાણને કારણે તેમણે કાઉન્સિલર પદ છોડવા માટે પગલાં ભર્યાં હતાં, પરંતુ હવે તેઓ આ પદ પર ચાલુ રહેશે. તેમણે BJP છોડવાના અહેવાલોને પણ નકારી કાઢ્યા અને પોતાને 'મોદી ભક્ત' ગણાવ્યાં.

આખરે રાજીનામું આપવાની સ્થિતિ કેમ ઊભી થઈ?

શ્રીલેખા તિરુવનંતપુરમ મહાનગરપાલિકાના સસ્થામંગલમ વોર્ડનાં BJP કાઉન્સિલર છે. એક અઠવાડિયા પહેલાં તેમણે મેયર વી.વી. રાજેશને રાજીનામું સોંપ્યું હતું. જોકે, રાજીનામું મહાનગરપાલિકાના સચિવને સોંપવામાં આવ્યું ન હોવાથી તેની પ્રક્રિયા પૂર્ણ થઈ નહોતી. ત્યાર બાદ BJPના નેતાઓએ તેમનો સંપર્ક કર્યો અને અંતે તેમણે પદ છોડવાનો નિર્ણય બદલી નાખ્યો.

આ વિવાદ અંગે મૌન તોડતાં શ્રીલેખાએ પોતાની YouTube ચેનલ 'Sasneham Sreelekha' પર જણાવ્યું કે કાઉન્સિલર તરીકે કામ કરતી વખતે તેમના પર ઘણું દબાણ હતું. જમીન અને સીમા સંબંધિત નાના વિવાદો જેવી સમસ્યાઓ લઈને પણ લોકો તેમના ઘર અને કાર્યાલયે પહોંચી જતા હતા અને તાત્કાલિક ઉકેલની અપેક્ષા રાખતા હતા. તેમણે એમ પણ કહ્યું કે લગ્ન, અંતિમવિધિ અને બાળકોને લગતા કાર્યક્રમોમાં હાજરી આપવી પડતી હતી. આ ઉપરાંત રવિવારે પણ તેઓ વ્યસ્ત રહેતાં હતાં.

'હું મોદી ભક્ત છું, BJP નહીં છોડું'

રાજીનામું આપવાના પ્રયાસ બાદ શ્રીલેખા BJPમાં રહેશે કે નહીં તે અંગે પણ અટકળો તેજ થઈ હતી. હવે તેમણે આ અંગે સ્પષ્ટતા કરી છે. તેમણે કહ્યું કે તેઓ 'મોદી ભક્ત' છે, પાર્ટી છોડી રહ્યાં નથી અને ગર્વપૂર્વક કાઉન્સિલર પદ પર યથાવત રહેશે. તેમણે અન્ય કોઈ પાર્ટીમાં જોડાવાની શક્યતા પણ નકારી કાઢી હતી.

આ સાથે શ્રીલેખાએ એ અટકળોને પણ ફગાવી દીધી હતી કે મેયરનું પદ અથવા રાષ્ટ્રીય મહિલા આયોગ સાથે જોડાયેલું કોઈ પદ ન મળવાને કારણે તેમણે રાજીનામું આપવાનો પ્રયાસ કર્યો હતો.

પોલીસ સેવામાં રચ્યો હતો ઇતિહાસ

આર. શ્રીલેખા 1987 બેચનાં કેરળ કેડરનાં IPS અધિકારી છે. તેઓ કેરળનાં પ્રથમ મહિલા IPS અધિકારી બન્યાં હતાં અને ત્યાર બાદ DGPનો હોદ્દો મેળવનારાં રાજ્યનાં પ્રથમ મહિલા IPS અધિકારી પણ બન્યાં હતાં. તેઓ 2020માં કેરળ ફાયર એન્ડ રેસ્ક્યૂ સર્વિસનાં મહાનિર્દેશક પદેથી નિવૃત્ત થયાં હતાં.

પોલીસ સેવામાં જોડાતાં પહેલાં તેઓ કોલેજમાં અધ્યાપક હતા અને ભારતીય રિઝર્વ બેંકમાં પણ કામ કર્યું હતું. તેમણે તિરુવનંતપુરમની ગવર્નમેન્ટ કોલેજ ફોર વિમેનમાંથી અંગ્રેજી સાહિત્યનો અભ્યાસ કર્યો હતો. ત્યાર બાદ IGNOUમાંથી હ્યુમન રિસોર્સ મેનેજમેન્ટમાં MBA કર્યું હતું.

શ્રીલેખાને 2004માં ઉત્કૃષ્ટ સેવા બદલ President's Police Medal અને 2013માં વિશિષ્ટ સેવા બદલ President's Police Medalથી સન્માનિત કરવામાં આવ્યાં હતાં. તેમને બ્રિટન સરકારની Chevening Fellowship પણ મળી હતી. આ અંતર્ગત તેમણે King's College London સહિત વિવિધ સંસ્થાઓમાં અભ્યાસ કર્યો હતો અને Scotland Yard/Metropolitan Policeમાં વિશેષ તાલીમ પણ મેળવી હતી.

2024માં BJPમાં જોડાયાં

પોલીસ સેવામાંથી નિવૃત્ત થયા બાદ શ્રીલેખા ઑક્ટોબર 2024માં BJPમાં જોડાયાં હતાં. ત્યાર બાદ તેઓ પાર્ટીના કેરળ એકમનાં ઉપાધ્યક્ષ બન્યાં હતાં.

2025ની સ્થાનિક સ્વરાજ્યની ચૂંટણીમાં તેઓ તિરુવનંતપુરમ મહાનગરપાલિકાના સસ્થામંગલમ વોર્ડમાંથી જીત્યાં હતાં. 2026ની વિધાનસભા ચૂંટણીમાં તેમણે વટ્ટિયૂરકાવુ બેઠક પરથી BJPના ઉમેદવાર તરીકે ચૂંટણી પણ લડી હતી, પરંતુ કોંગ્રેસના કે. મુરલીધરનનો વિજય થયો હતો.

હાલમાં રાજીનામું આપવાનો વિચાર પડતો મૂકીને શ્રીલેખાએ સ્પષ્ટ કર્યું છે કે તેઓ BJP અને કાઉન્સિલર પદ, બંને પર ચાલુ રહેશે.