જમ્મુ-કાશ્મીરના કિશ્તવાડમાં બુધવારે ગુમ થયેલા બે સ્પેશિયલ પોલીસ ઓફિસર (SPO)ના મૃતદેહ દચ્છન વિસ્તારમાંથી મળી આવ્યા છે. અપહરણ અને હત્યામાં સામેલ આતંકવાદીઓની શોધખોળ માટે મોટા પાયે સર્ચ ઓપરેશન શરૂ કરવામાં આવ્યું છે. બંને SPOના મૃતદેહ પાસેથી તેમનાં હથિયારો મળી આવ્યાં નથી.
કિશ્તવાડ જિલ્લાના ઊંચાણવાળા વિસ્તારો અને ગાઢ જંગલો ધરાવતા દુર્ગમ વિસ્તારોમાં સર્ચ અને ઘેરાબંધી અભિયાન તેજ કરવામાં આવ્યું છે. ભારતીય સેના, જમ્મુ-કાશ્મીર પોલીસના સ્પેશિયલ ઓપરેશન્સ ગ્રુપ (SOG) અને કેન્દ્રીય સુરક્ષા દળોની ટીમો આ કામગીરીમાં જોડાઈ છે.
બુધવારે કિશ્તવાડ જિલ્લાના દચ્છન વિસ્તારના ઊંચા પહાડી અને જંગલ વિસ્તારમાંથી બંને પોલીસ અધિકારીઓ ગુમ થયા હતા. તેમની શોધખોળ માટે મોટા પાયે અભિયાન હાથ ધરવામાં આવ્યું હતું.
અધિકારીઓએ તપાસનો વ્યાપ વધારીને જંગલ વિસ્તારો અને દુર્ગમ પહાડી રસ્તાઓ પર ડ્રોન તથા સ્નિફર ડોગ્સની મદદથી શોધખોળ શરૂ કરી હતી. વિશેષ ટીમો પણ આ અભિયાનમાં જોડાઈ હતી.
શરીર પર ગોળીઓનાં અનેક નિશાન
જમ્મુ-કાશ્મીરના કિશ્તવાડમાં અપહરણ અને હત્યાની ઘટનામાં સામેલ આતંકવાદીઓની શોધખોળ માટે મોટા પાયે અભિયાન ચલાવવામાં આવી રહ્યું છે. ગુરુવારે શોધખોળ દરમિયાન દચ્છનના જંગલોમાંથી બંને SPOના મૃતદેહ મળી આવ્યા હતા.
સૂત્રોના જણાવ્યા અનુસાર, બંનેના મૃતદેહ તેઓ જ્યાંથી ગુમ થયા હતા તે સ્થળથી આશરે 2 કિલોમીટર દૂર મળી આવ્યા હતા. બંને SPOના શરીર પર ગોળીઓનાં અનેક નિશાન જોવા મળ્યાં હતાં.
બુધવારથી ગુમ હતા બંને SPO
દચ્છનના કિયાર ગામમાં સ્થાનિક પોલીસના સ્પેશિયલ ઓપરેશન્સ ગ્રુપ (SOG)માં તૈનાત બાબી ચંદ અને રશપાલ કુમાર બુધવારથી ગુમ હતા. બાબી ચંદની ઉંમર 57 વર્ષ અને રશપાલ કુમારની ઉંમર 45 વર્ષ હતી.
મળતી માહિતી મુજબ, બંને પોતાના કેમ્પમાંથી ધરના-મરવાહ સ્થિત સેનાની એક ચોકી તરફ જઈ રહ્યા હતા ત્યારે ગુમ થયા હતા. તે સમયે તેમના મોબાઇલ ફોન પર સંપર્ક થઈ શક્યો નહોતો. બાદમાં બંનેના ફોન સ્વિચ ઓફ મળી આવ્યા હતા.
જમ્મુ-કાશ્મીરનું કિશ્તવાડ આતંકવાદ વિરોધી અભિયાનોનું કેન્દ્ર રહ્યું છે. અહીં સતત ચલાવવામાં આવેલા આતંકવાદ વિરોધી અભિયાનોમાં અનેક સક્રિય આતંકવાદીઓ માર્યા ગયા છે.
આંકડા મુજબ, વર્ષ 2026માં આતંકવાદ સંબંધિત ઘટનાઓમાં કુલ 5 લોકોનાં મોત થયાં હતાં, જેમાં ચાર આતંકવાદીઓ અને એક જવાનનો સમાવેશ થાય છે.
કિશ્તવાડમાં અપહરણ અને હત્યાની ઘટનામાં સામેલ આતંકવાદીઓની શોધખોળ માટે મોટા પાયે અભિયાન શરૂ કરવામાં આવ્યું છે.
વધુ સમાચાર વાંચવા ડાઉનલોડ કરો સંદેશ ન્યૂઝ એપ : https://sandesh.com/d
