પશ્ચિમ એશિયામાં ચાલી રહેલા તણાવ અને વૈશ્વિક ચિંતાઓને સંબોધવા માટે કેન્દ્ર સરકાર દ્વારા બોલાવવામાં આવેલી સર્વપક્ષીય બેઠક શરૂ થઈ ગઈ છે. આ ઓલ પાર્ટી મીટમાં તૃણમૂલ કોંગ્રેસ (ટીએમસી) એ બેઠકનો બહિષ્કાર કર્યો છે.
રાહુલ ગાંધી અને ટીએમસીએ કર્યો બહિષ્કાર
લોકસભામાં વિરોધ પક્ષના નેતા રાહુલ ગાંધીએ એક દિવસ પહેલા (24 માર્ચ, 2026) જાહેરાત કરી હતી કે તેઓ કેરળમાં નિર્ધારિત વ્યસ્તતાને કારણે બેઠકમાં હાજરી આપશે નહીં. તેમણે કેન્દ્ર સરકારની વિદેશ નીતિ અંગે પણ આકરા પ્રહારો કર્યા હતા. આ બેઠકમાં મધ્ય પૂર્વની પરિસ્થિતિ પર ચર્ચા થવાની અપેક્ષા છે, અને વિરોધ પક્ષો પાસેથી સૂચનો પણ મંગાવવામાં આવશે.
રાજનાથસિંહની અધ્યક્ષતામાં બેઠક
સંરક્ષણ પ્રધાન રાજનાથ સિંહ આ સર્વપક્ષીય બેઠકની અધ્યક્ષતા કરી રહ્યા છે. રાજ્યસભામાં બોલતા, વડા પ્રધાન નરેન્દ્ર મોદીએ જણાવ્યું હતું કે પશ્ચિમ એશિયામાં ચાલી રહેલા સંઘર્ષથી ઊભી થયેલી પરિસ્થિતિને સંબોધવા માટે સાત નવા સશક્ત જૂથોની રચના કરવામાં આવી છે; આ જૂથો નિયમિતપણે એલપીજી પુરવઠા, આવશ્યક સેવાઓ અને અન્ય ક્ષેત્રોને લગતી બાબતોનું મૂલ્યાંકન કરશે અને તે મુજબ ભલામણો આપશે. જોકે, સરકારે કહ્યું છે કે હાલમાં દેશમાં તેલ અને ગેસની કોઈ અછત નથી.
કોણ કોણ છે બેઠકમાં હાજર
ગૃહમંત્રી અમિત શાહ અને કેન્દ્રીય મંત્રી જે.પી. નડ્ડા સર્વપક્ષીય બેઠકમાં હાજરી આપવા પહોંચ્યા છે. અન્ય ઉપસ્થિતોમાં સસ્મિત પાત્રા (બીજેડી), લલન સિંહ અને સંજય ઝા (જેડી(યુ)), તારિક અનવર અને મુકુલ વાસનિક (કોંગ્રેસ), જોન બ્રિટાસ (સીપીઆઈ(એમ)), વિદેશ મંત્રી એસ. જયશંકર; વિદેશ સચિવ વિક્રમ મિશ્રી અને પેટ્રોલિયમ મંત્રી હરદીપ પુરીનો સમાવેશ થાય છે.
આ પણ વાંચો: ભારતના કયા રાજ્યમાં તેલના સૌથી વધારે કૂવા ?
