રેપ આરોપીને પરીક્ષામાં હાજર રહેવા માટે કામચલાઉ જામીનની વિનંતી કર્યા બાદ આ આદેશ કરવામાં આવ્યો હતો.
કડક શરતો હેઠળ રાહત
મુંબઈની એક ખાસ POCSO કોર્ટે રેપ અને POCSO કાયદા હેઠળ જેલમાં બંધ 18 વર્ષીય આરોપીને NEET પુનઃપરીક્ષામાં હાજર થવા માટે ચાર દિવસના જામીન આપ્યા છે. કોર્ટે કડક શરતો હેઠળ રાહત આપી છે અને પરીક્ષા પછી નિયત સમયે આત્મસમર્પણ કરવાનો નિર્દેશ કર્યો છે. આરોપી હાલમાં નવી મુંબઈની તલોજા સેન્ટ્રલ જેલમાં બંધ છે. કોર્ટે તેને 50 હજારના વ્યક્તિગત બોન્ડ અને એટલી જ રકમની જામીન પર 18થી21 જૂન સુધી કામચલાઉ જામીન આપ્યા છે. પરીક્ષા પછી 22 જૂને બપોરે 2 વાગ્યા પહેલાં સંબંધિત અધિકારીઓ સમક્ષ આત્મસમર્પણ કરવાનો પણ આદેશ કર્યો છે.
આરોપીના વકીલની દલીલ
જોકે, પીડિતાએ શરત રાખી હતી કે, આરોપી જામીન પર હોય ત્યારે તેના પરિવારને કોઈપણ રીતે ધમકી આપશે નહીં અથવા તેમની છબી ખરાબ કરવાનો પ્રયાસ કરશે નહીં. સુનાવણી દરમિયાન, આરોપીનું પ્રતિનિધિત્વ કરતા વકીલ કપિલ વિશ્વાસ જોધગેએ કોર્ટને જણાવ્યું હતું કે ફોજદારી ન્યાય પ્રણાલીનો હેતુ ફક્ત સજા કરવાનો નથી, પરંતુ સુધારા અને પુનર્વસન માટે તક પૂરી પાડવાનો પણ છે. તેમણે દલીલ કરી હતી કે આરોપીને મેડિકલ પ્રવેશ પરીક્ષામાં હાજર રહેવાની તક આપવી જોઈએ જેથી તે તેના ભવિષ્યને સુધારવા માટે પગલાં લઈ શકે.
જામીન અરજીનો વિરોધ
બચાવ પક્ષે એવી પણ દલીલ કરી હતી કે, પોલીસ સુરક્ષા હેઠળ પરીક્ષામાં હાજર રહેવાથી તેના માનસિક સંતુલન અને તૈયારી પર અસર પડી શકે છે. સ્પેશિયલ પબ્લિક પ્રોસિક્યુટર ચૈત્રાલી પાંશીકરે આરોપોની ગંભીરતાને ટાંકીને જામીન અરજીનો વિરોધ કર્યો હતો. ફરિયાદ પક્ષે સૂચવ્યું હતું કે આરોપીને માત્ર એક દિવસ માટે પોલીસ સુરક્ષા હેઠળ પરીક્ષા આપવાની મંજૂરી આપવામાં આવે.
નિયમોનુ પાલન કરવા આદેશ
બચાવ પક્ષ દ્વારા રજૂ કરાયેલા ઉચ્ચતર માધ્યમિક પરીક્ષાના પ્રમાણપત્ર અને કામચલાઉ NEET પ્રવેશપત્રની સમીક્ષા કર્યા પછી, કોર્ટે તારણ કાઢ્યું કે આરોપીને મર્યાદિત જામીન આપવા માટે પૂરતા કારણો અસ્તિત્વમાં છે. કોર્ટે સ્પષ્ટ કર્યું કે ફરિયાદ પક્ષની ચિંતાઓને કડક શરતો દ્વારા દૂર કરી શકાય છે. કોર્ટે આરોપીને પીડિતા અથવા તેની સાથે સંકળાયેલા કોઈપણ વ્યક્તિનો સંપર્ક ન કરવાનો, કોઈપણ પુરાવા સાથે છેડછાડ ન કરવાનો અથવા કોઈપણ સાક્ષીઓને પ્રભાવિત કરવાનો પ્રયાસ ન કરવાનો નિર્દેશ આપ્યો. તેને પરીક્ષામાં હાજર રહેવા અને પુરાવા રજૂ કરવાનો પણ નિર્દેશ આપવામાં આવ્યો હતો.
આ પણ વાંચોઃ ફાંસી અને ક્રુસિફિકેશન વચ્ચે શું છે તફાવત, શા માટે તે છે અલગ?, જાણો
