ભારતે બંગાળની ખાડી વિસ્તારમાં NOTAM (Notice to Airmen) જાહેર કર્યું છે, જેના આધારે અંદાજ લગાવવામાં આવી રહ્યો છે કે ટૂંક સમયમાં લાંબા અંતરની મિસાઈલનું પરીક્ષણ થઈ શકે છે. રક્ષા નિષ્ણાતોનું માનવું છે કે આ દરમિયાન અગ્નિ-4 મિસાઈલનું ટેસ્ટિંગ થઈ શકે છે, જે ભારતની વ્યૂહાત્મક શક્તિનો મહત્વપૂર્ણ હિસ્સો છે.
મિસાઈલની મારક ક્ષમતા અંદાજે 3500થી 4000 કિલોમીટર સુધીની
આ ચેતવણી 25 એપ્રિલથી 6 મે 2026 સુધી માટે જાહેર કરવામાં આવી છે, જેમાં વિશાળ વિસ્તારને 'જોખમભર્યા વિસ્તાર' તરીકે જાહેર કરાયો છે. તેનો હેતુ વિમાનો અને જહાજોને પૂર્વચેતવણી આપવાનો છે, જેથી પરીક્ષણ દરમિયાન કોઈ જોખમ ઊભું ન થાય. અગ્નિ-4 મિસાઈલ ભારતની ઈન્ટરમિડિયેટ રેન્જ બેલિસ્ટિક મિસાઇલ (IRBM) છે, જેની મારક ક્ષમતા અંદાજે 3500થી 4000 કિલોમીટર સુધી છે. આ મિસાઈલ સોલિડ ફ્યુઅલ પર આધારિત છે અને ખૂબ જ ચોક્કસ નિશાન લગાવવાની ક્ષમતા ધરાવે છે. ખાસ વાત એ છે કે તેને રોડ અને રેલ બંને પ્લેટફોર્મ પરથી લોન્ચ કરી શકાય છે, જે તેની તૈનાતી અને સુરક્ષાને વધુ મજબૂત બનાવે છે.