ઓડિશામાં સતત પડી રહેલા ભારે વરસાદને કારણે સમગ્ર રાજ્યમાં પૂરનું ગંભીર જોખમ તોળાઈ રહ્યું છે. આ ભયાનક સ્થિતિને ધ્યાનમાં રાખીને રાજ્ય સરકારે યુદ્ધના ધોરણે રાહત અને બચાવ કામગીરી હાથ ધરી છે, જેના ભાગરૂપે અત્યાર સુધીમાં 70,000 થી વધુ લોકોને પ્રભાવિત વિસ્તારોમાંથી સુરક્ષિત સ્થળોએ ખસેડવામાં આવ્યા છે. વહીવટી તંત્ર દ્વારા નાગરિકો માટે કુલ ૩૯૫ રાહત શિબિરો શરૂ કરવામાં આવી છે. રાજ્યના મુખ્યમંત્રી મોહન ચરણ માઝી સ્થિતિનું જાતનિરીક્ષણ કરવા માટે દક્ષિણ ઓડિશાના પૂરગ્રસ્ત વિસ્તારોનું હવાઈ સર્વેક્ષણ કરશે.
13 જિલ્લાઓમાં ભારે પૂરની પરિસ્થિતિ
અધિકારીઓના જણાવ્યા અનુસાર, ઓડિશાના 13 જિલ્લાઓમાં અચાનક પૂર અને પાણી ભરાવાની ગંભીર ઘટનાઓ સામે આવી છે. આ પ્રભાવિત જિલ્લાઓમાં બાલાસોર, ભદ્રક, જાજપુર, મયુરભંજ, કાલાહાંડી, કોરાપુટ, નબરંગપુર, મલકાનગિરી, કેઓંઝર, નયાગઢ, કંધમાલ, બોલાંગીર અને જગતસિંહપુરનો સમાવેશ થાય છે. દરિયાકાંઠાના બાલાસોર જિલ્લામાં પરિસ્થિતિ સૌથી વધુ ચિંતાજનક છે, જ્યાં સુબર્ણરેખા, બુધાબલંગ, કંસબંસા અને સોઆ જેવી મુખ્ય નદીઓ ખતરાના નિશાનથી ઉપર વહી રહી છે. જલેશ્વરના રાજઘાટ ખાતે સુબર્ણરેખા નદીનું પાણીનું સ્તર ભયજનક સપાટીને વટાવી ગયું છે, જેના કારણે ભોગરાઈ, બસ્તા અને બાલિયાપાલ બ્લોકના અનેક ગામડાઓ જળમગ્ન થયા છે.