જયપુરના નિવાસી શિવ જોહરીએ પોતાની દીકરી શ્રુતિ જોહરીના લગ્નને યાદગાર બનાવવા માટે લગ્નકાર્ડની પરંપરાને નવી ઊંચાઈ પર પહોંચાડી છે. તેમણે 3 કિલોગ્રામ શુદ્ધ ચાંદીનો ઉપયોગ કરીને આશરે રૂ. 25 લાખ કિંમતનું અદ્વિતીય લગ્ન આમંત્રણ તૈયાર કર્યું છે. આ કાર્ડ 128 અલગ-અલગ ચાંદીના ટુકડાઓથી બનાવવામાં આવ્યું છે, જેમાં એકપણ નખ કે સ્ક્રૂનો ઉપયોગ કરવામાં આવ્યો નથી. 8 × 6.5 ઇંચના માપ અને 3 ઇંચ ઊંડાઈ ધરાવતું આ કાર્ડ 65થી વધુ બારીક કોતરાયેલા દેવી-દેવતાઓથી શોભિત છે.
દેવી-દેવતાઓથી શોભિત ચાંદીનું અદ્ભુત કાર્ડ
કાર્ડના શિર્ષ ભાગે શ્રી ગણેશાય નમઃ લખાણ સાથે ભગવાન ગણેશ સ્થાપિત છે. તેમના જમણે માતા પાર્વતી અને ડાબે ભગવાન શિવ છે. નીચે માતા લક્ષ્મી અને ભગવાન વિષ્ણુ દર્શાવવામાં આવ્યા છે. સાથે જ ભગવાન કૃષ્ણના જીવન પ્રસંગો, ભગવાન વિષ્ણુના દસ અવતાર, તેમજ દક્ષિણ ભારતીય શૈલીમાં પાંચ શરીર ધરાવતા કૃષ્ણ અને તેમની આસપાસ આઠ ગાયોની અદભુત રચના જોવા મળે છે. કાર્ડના બહારના સ્તર પર માતા લક્ષ્મીના આઠ સ્વરૂપો તેમના સેવકો અને સૂર્યદેવ સાથે દર્શાવવામાં આવ્યા છે. ભગવાન વેંકટેશ્વર બે સ્વરૂપોમાં ઉપસ્થિત છે. ઉપરાંત રથચાલકો, ચામર ધારણ કરેલા સેવકો, દીવો ધરાવતી દેવીઓ, શંખ અને નગારા વગાડતા દેવતાઓ પણ કોતરાયેલા છે.
